
Ուոլերն ընդգծել է սխալ գնումների համար պատասխանատվության և խարդախության ռիսկերի հարցերը, մինչ վճարային ընկերությունները չափորոշիչներ են մշակում հաճախորդների փոխարեն գնող գործակալների համար։
Գնորդների և վաճառողների միջև վստահությունը հաճախորդի փոխարեն գնումներ կատարող՝ գերբանականության գործակալների կիրառման ընդլայնման ամենամեծ խոչընդոտն է։ Այս մասին Դաշնային պահուստային համակարգի հրապարակած սեպտեմբերյան ելույթում ասել է Քրիստոֆեր Ուոլերը։ Նա առանձնացրել է երեք խնդիր՝ հաստատել գործակալի՝ վճարելու լիազորությունը, որոշել, թե ով է պատասխանատու սխալ գնման համար, և խարդախության ստուգումները հարմարեցնել գործակալների վարքագծին։ Ուոլերը նշել է, որ արտահայտել է իր սեփական տեսակետները, որոնք պարտադիր չէ, որ համընկնեն Դաշնային պահուստային համակարգի իր գործընկերների տեսակետների հետ։
Գերբանականությունը կարող է օգնել գնորդներին ապրանքներ ընտրել, սակայն ծրագրին ինքնուրույն գնումներ կատարելու լիազորություն տալը դեռ բախվում է պատվերի ձևակերպման և լիազորման խնդիրների։ Այս մասին սեպտեմբերի 30-ին Սան Ֆրանցիսկոյում անցկացված The AI Conference-ում ասել է Hedera AI Studio-ի արտադրանքի մենեջեր Լինդսի Ուոքերը։ Նրա պատմածը հոկտեմբերի 1-ին հրապարակել է The Register-ը։
Ուոքերը տարբերակել է գնումների աջակցությունը, երբ մարդը շարունակում է մասնակցել գնման որոշմանը, և ինքնավար գնումները, երբ գերբանականություն (ԳԲ) գործակալը որոշումներ է կայացնում հաճախորդի պատվիրակած լիազորությունների շրջանակում։ Առաջինը նա համարել է իրագործելի, իսկ երկրորդը՝ այն տարբերակը, որտեղ ներկայում խնդիրներ են առաջանում։
Ուոքերի նկարագրած՝ պատվեր ձևակերպելու փորձերից մեկի ժամանակ նրան գնման համար վիրտուալ քարտ կամ հաշիվ էին տրամադրել։ Սակայն գործակալը չէր կարողացել մուտք գործել առցանց խանութի նրա հաշիվ, որտեղ պահված էր առաքման հասցեն։ Այն նաև չէր կարողացել օգտվել վեբէջի՝ քարտի համարը լրացնելու դաշտից։ Ուոքերը ստիպված էր տվյալները ձեռքով մուտքագրել։
Մեկ այլ բարդություն էր տեղադրությունը։ Ուոքերի խոսքով՝ կայքը հարկերն ու առաքումը հաշվարկում էր՝ ելնելով հաճախորդի գտնվելու վայրից։ Հեռավար սերվերի վրա աշխատող գործակալը կարող է փոխել կայքի օգտագործած տեղադրության տվյալները։ Նրա օրինակը մատնանշում է խոչընդոտներ, որոնք չեն վերանում պարզապես վճարելու միջոց ունենալով․ գործակալին անհրաժեշտ է նաև հասանելիություն հաշվի տվյալներին և պատվերի ձևակերպման դաշտերին, իսկ կայքին՝ հաճախորդի համապատասխան տեղադրությունը։
Ուոլերի խոսքով՝ տեխնոլոգիական ընկերությունները, էլեկտրոնային առևտրի հարթակներն ու վճարային ծառայություններ մատուցողները մշակում են արձանագրություններ՝ գործակալների և վաճառողների փոխգործակցությունն ու վճարումների կատարումը ստանդարտացնելու համար։ Քարտային ցանցերը նաև հրապարակում են վճարողի անունից անվտանգ վճարումներ կատարելու տեխնիկական բնութագրեր, այդ թվում՝ գործակալներին գրանցելու և քարտապանների համաձայնությունները գրանցամատյանում արձանագրելու եղանակներ։ Դեռ պարզ չէ՝ առևտուրը կանցնի մեկ էկոհամակարգի համար նախատեսված՝ հարթակին հատուկ չափորոշիչների՞, թե՞ փոխգործունակ չափորոշիչների։ Երկրորդները նախատեսված են էլեկտրոնային առևտրի տարբեր համակարգերում, գործակալների միջերեսներում և վճարման եղանակների դեպքում աշխատելու համար։ Ուոլերի խոսքով՝ դրանք կարող են օգնել փոքր վաճառողներին ու վճարային ծառայություններ մատուցողներին մրցակցել։
Վճարումների ոլորտն ուսումնասիրում է այդ պահանջները։ The Register-ը հայտնել է, որ Mastercard-ը սեպտեմբերի 30-ին զեկույց է հրապարակել այն մասին, թե ինչպես կարելի է իրագործելի դարձնել «գործակալային առևտուրը»՝ ԳԲ գործակալների միջոցով կատարվող գնումներն ու գործարքները։ Mastercard-ի խոսքով՝ դրա համար անհրաժեշտ կլինի առևտրային ամբողջ շղթայի մասնակիցների ներգրավումը։
Ուոքերի խոսքով՝ x402 արձանագրությունը՝ ինտերնետային վճարումների կանոնների հավաքածուն, անդրադառնում է որոշ խնդիրների, սակայն դեռ զարգանում է և ընդգրկում է միայն վճարման փուլը։ Նրա սահմանմամբ՝ գործակալային առևտուրը ներառում է նաև ապրանքներ գտնելը, բանակցելը, գործարքների վերջնահաշվարկը և գնումից հետո լոգիստիկայի կազմակերպումը։ Նրա կարծիքով՝ հաճախորդի փոխարեն գնումներ կատարելու մեխանիզմն աշխատեցնելու համար անհրաժեշտ է փոխել այդ ամբողջ գործընթացը, ոչ թե պարզապես վճարման նոր եղանակ ստեղծել։
Հետազոտողի խոսքով՝ նույնականացման բացակայող ստուգումը նրան թույլ է տվել առանց վավեր մուտքային տվյալների հարցումներ կատարել Microsoft-ի ներքին վերլուծական ծառայությունում։ Նրա գնահատած 17,3 տրիլիոն տողը գողացված գրառումների թիվը չէր։
3 րոպե

Սթեյքինգի ծառայությունից օգտվողները կարող են զրկվել պարգևավճարներից կամ պարապուրդի համար տույժերի ենթարկվել։ MetaMask-ի պնդմամբ՝ իր դրամապանակներին անմիջական վտանգ չի սպառնում, սակայն ընկերությունը չի հայտնել, թե որ համակարգերն են տուժել։
3 րոպե

Ընկերությունն ասում է, որ արգելափակել է հաշիվները և փակել գաղտնագրված դատողությունները կրկին վերարտադրելու հնարավորությունը։ Ըստ ընկերության՝ գործողությունն իրականացնողներն ուղղակի հասանելիություն չեն ստացել օգտատերերի պահպանված զրույցներին։
2 րոպե