Apple-ը 99 երկրում օգտատերերին զգուշացրել է լրտեսական ծրագրով հնարավոր հարձակումների մասին

Apple-ը 99 երկրի օգտատերերի սպառնալիքի մասին ծանուցումներ է ուղարկել՝ զգուշացնելով, որ նրանք կարող էին վարձկան լրտեսական ծրագրով հարձակման թիրախ դառնալ։ Այդ մասին վկայում է հասցեատերերից մեկի տարածած ծանուցումը, որը ներկայացրել է TechCrunch-ը։ Գերմանիայի կառավարությունը հայտնել է, որ հետաքննություն է սկսել այն բանից հետո, երբ պատգամավորներն ու պաշտոնյաները նման ահազանգեր են ստացել։

Apple-ը պարբերաբար նման զգուշացումներ է ուղարկում։ Նախորդ ալիքի ժամանակ՝ օգոստոսի 13-ին, դրանք ստացել էին 110 երկրի օգտատերեր, գրել է Techaeris-ը։ Երկրների վերջին թիվը ցույց է տալիս ծանուցումների աշխարհագրական ընդգրկումը, ոչ թե զգուշացված մարդկանց կամ վարակված սարքերի քանակը․ Apple-ը չի հայտնել հասցեատերերի թիվը։

Apple-ի խոսքով՝ իր ահազանգերը վկայում են վստահության բարձր աստիճանի մասին, որ անձն անհատապես թիրախավորվել է, սակայն ընկերության հետաքննությունները չեն կարող բացարձակ վստահություն ապահովել։ Զգուշացումը չի հաստատում, որ սարքը կոտրվել է։ Ընկերությունն ասում է, որ վարձկան լրտեսական ծրագրերով հարձակումների ժամանակ բացառիկ մեծ ռեսուրսներ են կենտրոնացվում փոքրաթիվ մարդկանց թիրախավորելու համար։

Գերմանիան հետաքննում է ահազանգերը

Գերմանիայի պատգամավորներն ու կառավարական պաշտոնյաները սկսել են ահազանգեր ստանալ հոկտեմբերի 29-ին, գրել է Financial Times-ը, որի հրապարակումը ներկայացրել է 9to5Mac-ը։ Հանգստյան օրերին Գերմանիայի տեղեկատվական անվտանգության դաշնային գերատեսչությունը հասցեատերերին խորհուրդ է տվել ենթադրել, որ իրենց սարքերն այլևս անվտանգ չեն։ Կառավարությունը հայտարարել է, որ շատ լուրջ է վերաբերվում զգուշացմանը և ինտենսիվ աշխատում է հանգամանքները հետաքննելու ուղղությամբ։

Կառավարության խոսնակ Շտեֆան Կոռնելիուսը հրաժարվել է ասել՝ տուժածների թվում արդյոք կանցլեր Ֆրիդրիխ Մերցը կա։ Financial Times-ը նաև գրել է, որ հարձակումների ժամանակ շահագործվել է «զրոյական սեղմումով» խոցելիություն՝ անվտանգության թերություն, որը կարող է թույլ տալ կոտրել սարքը՝ առանց թիրախավորված անձի կողմից հղում բացելու կամ այլ գործողություն կատարելու։ Պարբերականի խոսքով՝ հարձակվողներին անհրաժեշտ է եղել միայն թիրախի հեռախոսահամարը։ Դեռ պարզ չէ, թե ով է կանգնած հարձակումների հետևում կամ որ կառավարությունը կարող էր կազմակերպել թիրախավորումը։