Հայաստանում կարգելվի որոշ պլաստիկ տոպրակների և մեկանգամյա պլաստիկ ապրանքների մանրածախ առևտուրը

ՀՀ շրջակա միջավայրի նախարարությունը հայտնել է, որ 2027 թ․ հունվարի 1-ից մանրածախ առևտրում կարգելվի պոլիէթիլենային տոպրակների և մեկանգամյա օգտագործման որոշ պլաստիկ ապրանքների տրամադրումն ու առկայությունը։ Օրենքով բացառություն է արվում ապրանքների կշռափաթեթավորման համար օգտագործվող տոպրակների, վերամշակված հումքից պատրաստված աղբի տոպրակների և ապրանքների կշռափաթեթավորման համար օգտագործվող կափարիչով պլաստիկ տարաների համար։

Սահմանափակումները նախատեսված են 2026 թ․ մարտի 25-ին ընդունված՝ «Առևտրի և ծառայությունների մասին» օրենքի ՀՕ-110-Ն փոփոխությամբ։ Դրանք տարածվում են մանրածախ առևտրի և հանրային սննդի օբյեկտների, առևտրի իրականացման վայրերի, շրջիկ առևտրի կետերի, տոնավաճառների, ցուցահանդես-վաճառքների, շրջածախ և բացօթյա մանրածախ առևտրի վրա։

Որ ապրանքներին են վերաբերում սահմանափակումները

Օրենքում թվարկված են մեկանգամյա օգտագործման պլաստիկ տարաները, այդ թվում՝ փրփրապլաստից պատրաստված, ինչպես նաև ափսեները, բաժակները, բաժակների կափարիչները, գդալները, պատառաքաղները, դանակները, խմելու ձողիկները և խառնիչները։ Սահմանափակումներն ուժի մեջ մտնելուց հետո փաթեթավորման միջոցների համար նախատեսված բացառությունները կշարունակեն գործել։