Ավստրալիայի Վիկտորիա նահանգի ոստիկանությունը փրկել է վեց օր կորած դեռահասին

Վիկտորիայի ոստիկանության օդային ստորաբաժանումը նոյեմբերի 12-ի առավոտյան Ավստրալիայի Վիկտորիա նահանգի Ուոլհալա քաղաքի մոտ ողջ է գտել Ուիլյամին։ Նա վեց օր անհետ կորած էր խիտ անտառուտում։ Նրա ազգանունը չի հրապարակվել։

Սթոունի Քրիքի մոտ որոնումների ընթացքում փրկարարները նախ նկատել են ձկնորսական պարագաների արկղը, ապա տեսել են չոր գետի հունում՝ ժայռի վրա քնած Ուիլյամին, հայտնել է DW-ն։ Ոստիկանությունը հայտնել է, որ օդային ստորաբաժանման աշխատակիցներին ճախարակով իջեցրել են՝ նրան դուրս բերելու համար։ Նրանք Ուիլյամին տեղափոխել են հրամանատարական կետ, որտեղ նա վերամիավորվել է մոր հետ։

Ոստիկանությունը հայտնել է, որ Ուիլյամը բարձր տրամադրություն ունի և, ընդհանուր առմամբ, առողջ է։ Նրա մայրը՝ Էլիզաբեթ Բարքլին, ասել է, որ նա ընդամենը մի քանի քերծվածք ունի և լավ ու առողջ տեսք ունի։ Նրան տեղափոխել են հիվանդանոց՝ հսկողության։

Ինչպես է անհետացել Ուիլյամը

Ուիլյամն ընկերոջ հետ ճամբարային հանգիստ էր անցկացնում Վիկտորիա նահանգի Գիպսլենդ շրջանում՝ Ուոլհալայի մոտ, ուր նրան բերել էր մայրը։ Ենթադրվում է, որ նա ոտքով վերադարձել է դեպի այն վայրը, որտեղ մայրն իջեցրել էր իրեն, որպեսզի լրացուցիչ ճամբարային պարագաներ վերցնի։ Ոստիկանությունը հայտնել է, որ նրան վերջին անգամ տեսել են նոյեմբերի 6-ին՝ Քաուարի և Ուոլհալայի միջև ընկած Սթոունի Քրիք ճանապարհի մոտ։

Նա հագել էր միայն կարճ տաբատ և աշխատանքային կոշիկներ, իսկ հեռախոսը, սնունդն ու ջուրը թողել էր իր հետևում։ Ընկերը փնտրել է նրան, ապա զանգահարել ոստիկանություն։ Որոնումներին մասնակցել են ուղղաթիռներ, մասնագիտացված ստորաբաժանումներ, ոստիկանական շներ, ջրասուզակներ և կամավորներ, որոնք ամեն օր փնտրել են նրան անտառուտում։ Գիշերային չափազանց ցածր ջերմաստիճանը մտահոգություն էր առաջացրել նրա վիճակի համար։

Ոստիկանությունը հայտնել է, որ Ուիլյամն օրեր շարունակ քայլել է դժվարանցանելի տեղանքով, ապա փրկվելուց երկու օր առաջ գահավիժել է գետի հունի լանջով։ Նա մնացել է այնտեղ՝ հուսալով, որ իրեն կգտնեն։