«Ճեղքելով պատնեշը» ֆիլմի համար «Օսկարի» առաջադրված Բարբարա Բարին մահացել է 95 տարեկանում

95 տարեկանում մահացել է դերասանուհի Բարբարա Բարին, որը «Ճեղքելով պատնեշը» ֆիլմում խաղացած դերի համար առաջադրվել էր «Օսկարի»։ Նա մահացել է հոկտեմբերի 28-ին՝ Մանհեթենի իր տանը, գրել է The Hollywood Reporter-ը՝ հղում անելով The New York Times-ին։

IndieWire-ը գրել է, որ Բարիի դուստրը՝ Ջեյն Հարնիկը, The New York Times-ին ասել է՝ մայրը քաղցկեղի վերջին փուլում էր, և նրա մահը տեղի է ունեցել բժշկական աջակցությամբ։

1979-ի «Ճեղքելով պատնեշը» ֆիլմում Բարին մարմնավորել է Էվելին Ստոլերին՝ հեծանվավազքով տարված երիտասարդի բանվոր դասակարգին պատկանող մորը։ Այդ դերի համար նա առաջադրվել է «Օսկարի»՝ երկրորդ պլանի լավագույն դերասանուհի անվանակարգում։ 1980-ին Բարին կրկին խաղացել է նույն դերը ֆիլմի հեռուստատեսային էկրանավորման մեջ, ինչի համար 1981-ին առաջադրվել է «Էմմիի»։

Կաննից Բրոդվեյ

1964-ին Բարին Կաննի կինոփառատոնի լավագույն դերասանուհու մրցանակն էր ստացել «Մեկ կարտոֆիլ, երկու կարտոֆիլ» ֆիլմի համար։ Նա մարմնավորել էր ամուսնալուծված Ջուլի Քալեն Ռիչարդսին, որի նախկին ամուսինը պահանջում է երեխայի խնամակալությունն այն բանից հետո, երբ կինն ամուսնանում է սևամորթ տղամարդու հետ։ Ֆիլմն անդրադառնում էր նրանց ամուսնության նկատմամբ ռասայական նախապաշարմունքներին։

Բրոդվեյում Բարին առաջինն է մարմնավորել Սառային՝ Սթիվեն Սոնդհայմի «Ընկերություն» մյուզիքլի 1970-ի բեմադրությունում։ Մյուզիքլը հարաբերությունների և պարտավորություններ ստանձնելու մասին է։ Դերի համար Բարին 1971-ին առաջադրվել է «Թոնի» մրցանակի՝ մյուզիքլում երկրորդ պլանի լավագույն դերասանուհի անվանակարգում։

Հեռուստադիտողները Բարիին ճանաչում էին նաև «Բարնի Միլեր» դետեկտիվ հեռուստակատակերգությունից, որտեղ նա 1975–1978 թվականներին խաղացել է գլխավոր հերոսի կնոջ՝ Էլիզաբեթի դերը։ 1980-ի «Շարքային Բենջամին» ֆիլմում նա մարմնավորել է գլխավոր հերոսուհու մորը։