Հնդկաստանը Դելիում սահմանափակել է դիզելային գեներատորների օգտագործումն ու վառելիքի այրումը

Ձմռանն օդի որակի վատթարացումից հետո Դելիում սահմանափակում են դիզելային գեներատորների օգտագործումն ու ածխի և վառելափայտի այրումը՝ աղտոտման դեմ դաշնային ծրագրի երկրորդ փուլի շրջանակում։ Դիվալիից առաջ քաղաքի և հարակից շրջանների դպրոցներին արդեն կարգադրել էին առցանց դասեր անցկացնել։

Հնդկաստանի աղտոտման վերահսկման կենտրոնական խորհուրդը նոյեմբերի 7-ին գրանցել է օդի որակի 362 ցուցանիշը, որը դասվում է «շատ վատ» կատեգորիայի։ Դա Դելիում Դիվալիի նախօրյակին գրանցված վերջին 10 տարվա ամենավատ ցուցանիշն էր, հայտնել է DW-ն։ Խորհրդի գրանցած՝ Դիվալիին նախորդող օրվա նախկին ամենավատ ցուցանիշը 404-ն էր՝ 2016 թ․ հոկտեմբերի 29-ին։

Դաշնային սահմանափակումներն ու Դելիի ձմեռային ծրագիրը

Օդի որակի կառավարման դաշնային հանձնաժողովը վերահսկում է փուլային արձագանքման գործողությունների ծրագիրը, որով աղտոտման աճին զուգընթաց ավելի խիստ միջոցներ են կիրառվում։ Իշխանությունները գործարկել են դրա երկրորդ փուլը՝ փոշին, մեքենաների արտանետումներն ու աղտոտման այլ աղբյուրները նվազեցնելու համար, հայտնել է BBC-ն։

Դելիի առանձին ձմեռային գործողությունների ծրագիրը գործում է նոյեմբերի 1-ից մինչև փետրվարի 28-ը՝ այն ամիսներին, երբ աղտոտումը սովորաբար կտրուկ աճում է։ Այն սահմանափակում է Դելիից դուրս գրանցված ավելի հին և ավելի շատ աղտոտող մեքենաների մուտքը։ Արտանետումների չափանիշներին համապատասխանությունը հավաստող փաստաթուղթ չունեցող մեքենաներին վառելիք չի տրամադրվում։ Փոշի առաջացնող քանդման աշխատանքներն ու բացօթյա շինարարությունը ժամանակավորապես արգելվել են։

Դելիի սահմաններին մեքենաների ստուգումների պատճառով երկար հերթեր են գոյանում, և աշխատանքի մեկնողները ժամերով մնում են խցանումների մեջ։ Հազարավոր մարդիկ ամեն օր աշխատանքի համար երթևեկում են Դելիի և մոտակա Նոյդա ու Գուրուգրամ քաղաքների միջև։

Անձնական մեքենաների օգտագործումը նվազեցնելու համար Դելիի կառավարությունը գրասենյակներին խնդրել է թույլ տալ աշխատակիցների կեսին աշխատել տնից, իր աշխատակիցների համար սահմանել է աշխատանքի տարբեր ժամեր և կրկնապատկել կայանման վճարները։