Կոնգոյի ԴՀ-ի ռազմական դատարանը մահապատժի է դատապարտել առնվազն 66 զինվորի

Կոնգոյի Դեմոկրատական Հանրապետության ռազմական դատարանն առնվազն 66 զինվորի մահապատժի է դատապարտել վախկոտության, խռովության և հրամաններին չենթարկվելու համար, գրել է BBC-ն՝ վկայակոչելով տեղական լրատվամիջոցներին։ Երկրի արևելքում գտնվող Հյուսիսային Կիվու նահանգի Վալիկալե քաղաքում դատված 71 զինվորից 4-ն արդարացվել է, իսկ մեկը դատապարտվել է 10 տարվա ազատազրկման։

Դատավճիռը հաջորդել է Կոնգոյի ԴՀ-ի՝ 2024 թվականի մարտին մահապատժի 20-ամյա մորատորիումը վերացնելու որոշմանը։ Կառավարությունը հայտարարել էր, որ անհրաժեշտ է բանակն ազատել «դավաճաններից»։ Մորատորիումի վերացումից ի վեր պաշտոնապես մահապատիժներ չեն իրականացվել։

Դատավարությունն ու մարտերը

Գոմայի կայազորի ռազմական դատարանն առաջին ատյանի դատավճիռը կայացրել է նոյեմբերի 6-ին՝ 12 օր տևած դատավարությունից հետո։ ACP-ի մեջբերած հայտարարության մեջ 34-րդ ռազմական շրջանը հայտնել է, որ ամբաստանյալները ծառայել են բանակի 3415-րդ գնդում և ձերբակալվել են հոկտեմբերի 20-ին Նգորայում։ Զինվորները մեղադրվում էին Ազգի վերահիմնադրման ճակատի մարտիկների հետ բախումների ժամանակ դիրքերը լքելու և փախուստի դիմելու մեջ։

Ճակատն ապստամբների դաշինք է, որի կազմում է նաև M23-ը։ Այն կռվում է կառավարական ուժերի դեմ մի տարածաշրջանում, որտեղ տասնամյակներ շարունակ հակամարտություն է ընթանում։ Բանակը հայտնել է, որ դատավարության նպատակը զինված խմբավորումների դեմ կռվող զորքերում կարգապահության բարելավումն էր։ Վատ կարգապահությունն ու անկազմակերպվածությունը խաթարել են բանակի ռազմական գործողությունները, իսկ զինվորները դժգոհել են ցածր վարձատրությունից և ոչ բավարար հանդերձանքից։

Ռազմականների հայտարարության համաձայն՝ ազատազրկման դատապարտված զինվորը սերժանտ էր, որի նկատմամբ հաշվի են առնվել էական մեղմացուցիչ հանգամանքներ։ Արդարացվածների թվում էր գնդի հետախուզության պետը՝ կապիտան։