Էկվադորում ձերբակալել են ընդդիմադիր առաջնորդ Լուիսա Գոնսալեսին՝ քարոզարշավի ֆինանսավորման գործով

Ինչպես հոկտեմբերի 22-ին հայտնել է Al Jazeera-ն, Էկվադորի ընդդիմադիր առաջնորդ Լուիսա Գոնսալեսը ձերբակալվել է իր՝ 2023-ի նախագահական քարոզարշավի ֆինանսավորման ենթադրյալ խախտումների քննության շրջանակում։ Տեղական լրատվամիջոցներին հղումով՝ լրատվամիջոցը հայտնել է, որ նրան ձերբակալել են Էկվադորի արևմուտքում գտնվող Կանուտո գյուղական բնակավայրում։

Գոնսալեսը թե՛ 2023-ի, թե՛ 2025-ի նախագահական ընտրություններում պարտվել է նախագահ Դանիել Նոբոային։ «Լաբերինտո» անունով հայտնի գործին նախորդել է քարոզարշավի ֆինանսավորման ենթադրյալ խախտումների մեկ այլ քննություն։

Ինչ է քննում դատախազությունը

Էկվադորի գլխավոր դատախազությունը հայտնել է, որ կատարել է փողերի լվացման՝ ապօրինի միջոցների ծագումը թաքցնելու կասկածանքով երեք անձի ձերբակալման հրամանները։ Քննվում է յոթ անձի առնչությունը 2023-ի քարոզարշավի նվիրատվություններում և միջոցների օրինական ծագման վերաբերյալ տվյալներում ենթադրվող անհամապատասխանություններին։

Քննիչները պարզում են՝ արդյոք մի շարք կազմակերպությունների ցանցի միջոցով 2023-ի մայիսից օգոստոս ընկած ժամանակահատվածում մոտ 500 000 դոլար է ուղղվել քարոզարշավի գովազդին։ Գլխավոր դատախազության պնդմամբ՝ գումարը կարող էր փոխանցվել խախտումներով՝ առանց միջոցների աղբյուրները կամ նվիրատուների ինքնությունը բացահայտելու։

Գոնսալեսին պաշտոնապես որևէ մեղադրանք առաջադրված լինելու մանրամասները և նրա ձերբակալության պայմանները դեռ պարզ չեն։

Գոնսալեսը հերքում է խախտումներ կատարելը

Գոնսալեսը հերքել է խախտումներ կատարելը և մեղադրանքներն անվանել «անհեթեթ»՝ իր վիճակը համեմատելով քաղբանտարկյալի վիճակի հետ։ Գոնսալեսի «Քաղաքացիական հեղափոխություն» շարժման նախագահ Գաբրիելա Ռիվադենեյրան ձերբակալությունը որակել է որպես քաղաքական հետապնդում և պահանջել անհապաղ ազատ արձակել նրան։