BBC-ն Սուդանի Էլ Ֆաշեր քաղաքում բուժհաստատությունների վրա առնվազն 43 հարձակում է արձանագրել

Բժիշկները խոսում են միտումնավոր թիրախավորման մասին, Արագ աջակցության ուժերը՝ հերքում

BBC-ի հետ զրուցած վեց բժիշկները նկարագրել են հետևողական թիրախավորման օրինաչափություն։ Պաշարման ընթացքում Էլ Ֆաշերում աշխատած վիրաբույժ Մուհամեդ Սուլիմանն ասել է, որ Արագ աջակցության ուժերը մտադիր էին հիվանդանոցները շարքից հանել, որպեսզի բնակիչներն այլևս չկարողանան մնալ քաղաքում։ Հարձակումների ընթացքում «Բժիշկներ առանց սահմանների» բժշկական բարեգործական կազմակերպությունը հայտնել էր, որ չգիտի՝ արդյոք հիվանդանոցները միտումնավոր են թիրախավորվում, սակայն նշել էր, որ պատերազմող կողմերը նախազգուշական միջոցներ չեն ձեռնարկում դրանք հարվածներից զերծ պահելու համար։

Արագ աջակցության ուժերի աջակցությունը վայելող քաղաքացիական կառավարության առողջապահության նախարար, բժիշկ Ալա Էլդին Նուգուդը մեղադրանքները որակել է որպես քարոզչություն, որով, ըստ նրա, Սուդանի բանակն ու նրա դաշնակիցները փորձում են արատավորել խմբավորման հեղինակությունը։ Հարձակումների մասին բժիշկների պատմածը նա անվանել է «ստերի շարունակություն» և պնդել, որ ցեղային ու ռասայական բաժանումների պատճառով շատ բուժաշխատողներ հարում էին բանակին և նրա տեղական դաշնակիցներին։

Նուգուդը պնդել է, թե Հարավային հիվանդանոցը հրթիռային արձակման կայանքներով ռազմակայան էր՝ ներկայացնելով զենքի մնացորդների տեսագրություն, որն արվել է հիվանդանոցի փակումից ավելի քան մեկ տարի անց։ Նա նաև ներկայացրել է այն, ինչն անվանել է Ուսումնական հիվանդանոցի շուրջ տեղադրված ականների քարտեզներ։ Այդ հիվանդանոցը գտնվում էր ռազմական շտաբի հարևանությամբ։

BBC-ն Նուգուդի պնդումները հաստատող անկախ ապացույցներ չի գտել։ Բժիշկներն ասել են, որ Ուսումնական հիվանդանոցը ռազմակայանի մաս չէր, իսկ Դարֆուրի տարածաշրջանային կառավարությունը հերքել է մեղադրանքները։ Այս տարբերակումը կարևոր է միջազգային մարդասիրական իրավունքի՝ զինված հակամարտությունները կարգավորող կանոնների տեսանկյունից․ հիվանդանոցները կարող են կորցնել իրենց պաշտպանությունը, եթե օգտագործվում են հակառակորդին վնասող գործողություն կատարելու համար։

Նուգուդը հերքել է, որ բժիշկներին բռնի առևանգել են՝ պնդելով, որ նրանք իրենց կամքով են մնացել աշխատելու։ Նրա վկայակոչած տեսանյութում երևացող բժիշկներից մեկը BBC-ին ասել է, որ իրեն ստիպել են մնալ։

ՄԱԿ-ի մարդու իրավունքների գերագույն հանձնակատար Ֆոլքեր Թյուրքն ասել է, որ հետաքննության արդյունքները համահունչ են իր գրասենյակի դիտարկումներին։ Նրա խոսքով՝ ՄԱԿ-ի մարդու իրավունքների գրասենյակը փաստագրել է Արագ աջակցության ուժերի բազմակի հարվածներ, որոնք ոչնչացրել կամ լրջորեն վնասել են հիմնական հիվանդանոցներն ու ժամանակավոր բուժհաստատությունները՝ խիստ սահմանափակելով քաղաքում արգելափակված հազարավոր խաղաղ բնակիչների բուժօգնության հասանելիությունը։ Թյուրքը քաղաքացիական ենթակառուցվածքների, այդ թվում՝ բուժհաստատությունների վրա հարձակումները որակել է որպես միջազգային մարդասիրական իրավունքի լուրջ խախտումներ, որոնք կարող են համարվել պատերազմական հանցագործություններ։

Վարչակազմը ցուցադրում է որոշ հիվանդանոցներում վերսկսված բուժօգնությունը

Էլ Ֆաշերում առողջապահությունն այժմ կառավարում է Արագ աջակցության ուժերի աջակցությունը վայելող կառավարությունը։ Այն հրապարակել է տեսանյութեր, որոնցում երևում է, որ Սաուդյան ծննդատունն ու Ուսումնական հիվանդանոցը վերաբացվել են, մաքրվել և որոշ հիվանդների բուժօգնություն են տրամադրում։

Նուգուդը BBC-ին նաև հայտնել է, որ Հարավային հիվանդանոցը պատրաստվում են վերաբացել։