Մեծ Բրիտանիայի պատգամավորները կոչ են արել Անգլիայում ընդլայնել Mounjaro-ի անվճար հասանելիությունը

Տարբեր կուսակցություններ ներկայացնող պատգամավորների խումբը կոչ է արել Անգլիայում ևս հարյուր հազարավոր մարդկանց Ազգային առողջապահական ծառայության միջոցով տրամադրել քաշի նվազեցման համար կիրառվող Mounjaro ներարկային դեղամիջոցը։ Ինչպես հոկտեմբերի 22-ին հայտնել է BBC-ն, Առողջապահության հանձնաժողովի առաջարկը միտված է պետական միջոցներով ֆինանսավորվող բուժումն ընդլայնելուն, սակայն ինքնին չի փոխում դրանից օգտվելու հնարավորությունները։

Գործող ծրագրով նախատեսվում է 2028 թվականին Mounjaro-ն դեղատոմսով անվճար տրամադրել 220 000 մարդու։ BBC-ի հաղորդմամբ՝ դա դեղը ստանալու չափանիշներին համապատասխանող մարդկանց մոտ 6%-ն է։ Ծախսերի պատճառով Ազգային առողջապահական ծառայությունը նախատեսել է դեղի հասանելիությունն ընդլայնել 12 տարվա ընթացքում, թեև այդ ժամանակացույցը վերանայվում է։

Չափանիշներին համապատասխանելը դեռ չի երաշխավորում դեղի անվճար ստացումը

BBC-ի տվյալներով՝ ավելի քան մեկ միլիոն մարդ սեփական միջոցներով է վճարում քաշի նվազեցման համար կիրառվող ներարկային դեղերի, այդ թվում՝ Mounjaro-ի և Wegovy-ի համար։ Հանձնաժողովի գնահատմամբ՝ Ազգային առողջապահական ծառայության միջոցով դրանք ստանալու սահմանափակ հնարավորությունները ստեղծում են երկաստիճան համակարգ, որտեղ ունևոր հիվանդներն ավելի հեշտությամբ են ձեռք բերում ախորժակը նվազեցնող դեղերը։ Ազգային առողջապահական ծառայությունը Wegovy-ն տրամադրում է միայն քաշի կառավարման մասնագիտացված ծառայությունների միջոցով։

BBC-ի ներկայացրած գնահատմամբ՝ եթե Mounjaro-ն անմիջապես տրամադրվի այն ստանալու չափանիշներին համապատասխանող բոլոր 2,8 միլիոն մարդկանց, ապա հինգ տարվա ընթացքում դա Ազգային առողջապահական ծառայության վրա կարժենա 15,2 միլիարդ ֆունտ։ Ծախսերի մի մասը պայմանավորված է նրանով, որ դեղի նշանակման և հիվանդների վիճակի հսկողության աշխատանքներում մեծապես ներգրավված են ընդհանուր պրակտիկայի՝ ընտանեկան բժիշկները։

Պատգամավորները կոչ են արել Ազգային առողջապահական ծառայությանը սովորել մասնավոր ծառայություններ մատուցողների փորձից, որոնք դեղերի նշանակման և հիվանդների վիճակի հսկողության աշխատանքների մի մասն իրականացնում են թվային հարթակներով։ Նրանց կարծիքով՝ հիվանդներին աջակցելու գործընթացի պարզեցումը կարող է նվազեցնել ծախսերը։