ՖԻՖԱ-ն ֆուտբոլի կանանց աշխարհի առաջնության նախապատրաստման բյուջեն հասցրել է 80 միլիոն դոլարի

Guardian-ի հաղորդմամբ՝ Ֆուտբոլի միջազգային ֆեդերացիան (ՖԻՖԱ) ավելի քան կրկնապատկել է Բրազիլիայում 2027-ին կայանալիք կանանց աշխարհի առաջնության յուրաքանչյուր հավաքականի նախապատրաստման ֆինանսավորումը՝ հասցնելով 2,5 միլիոն դոլարի։ Այդ գումարը կստանան մասնակից բոլոր 32 հավաքականները՝ նույնքան, որքան հատկացվել է տղամարդկանց 2026-ի աշխարհի առաջնության հավաքականներին։

Ավելացման արդյունքում նախապատրաստման ընդհանուր բյուջեն հասել է 80 միլիոն դոլարի՝ կանանց նախորդ՝ 2023-ի առաջնության 31 միլիոն դոլարի դիմաց։

Երաշխավորված չվերթներ և առանձին սենյակներ

Յուրաքանչյուր ֆուտբոլիստուհու համար երաշխավորվելու է բիզնես դասով կամ չարտերային չվերթով ուղևորություն, ինչպես նաև առանձին հյուրանոցային սենյակ՝ ուրիշի հետ սենյակը կիսելու փոխարեն։ ՖԻՖԱ-ի փոխանցմամբ՝ այս պայմաններով ուղևորության և կեցության կազմակերպումը կհամապատասխանեցվի տղամարդկանց աշխարհի առաջնության պայմաններին։

Ավստրալիայում և Նոր Զելանդիայում անցկացված կանանց 2023-ի աշխարհի առաջնության ժամանակ ոչ բոլոր ֆուտբոլիստուհիներն են օգտվել բիզնես դասից։ Guardian-ի փոխանցմամբ՝ առաջնությունից հետո ֆուտբոլիստների միության՝ Fifpro-ի անցկացրած հարցումը պարզել է, որ վերադարձի չվերթներին բիզնես դասից օգտված ֆուտբոլիստուհիների մասնաբաժինն ավելի փոքր է եղել, քան առաջնություն մեկնելիս։