ՖԻՖԱ-ն կանանց ԱԱ-ի առաջին քառյակին բաժանում է՝ խմբերում հաղթելու դեպքում

ՖԻՖԱ-ն հաստատել է, որ 2027-ի կանանց աշխարհի առաջնության ամենաբարձր վարկանիշ ունեցող չորս թիմերը չեն հանդիպի միմյանց մինչև կիսաեզրափակիչ, եթե նրանցից յուրաքանչյուրը հաղթի իր խմբում։ ՖԻՖԱ-ի խոսքով՝ կանոնը նման է 2026-ի տղամարդկանց աշխարհի առաջնությունում կիրառված կարգին և նպատակ ունի ապահովելու մրցակցային հավասարակշռություն։

Վարկանիշի առաջին և երկրորդ թիմերը կհայտնվեն փլեյ-օֆֆի հակառակ ուղիներում, ինչպես նաև երրորդ և չորրորդ թիմերը։ Եթե առաջին երկու թիմերը հաղթեն իրենց խմբերում, նրանք չեն կարող հանդիպել մինչև եզրափակիչ։ Խմբում չհաղթած թիմի համար այդ պայմանը չի գործում։

Ընտրական փուլի արդյունքները կարող են փոխել զամբյուղների կազմը

Գործող չեմպիոն Իսպանիան, ԱՄՆ-ը, Գերմանիան և Անգլիան այժմ զբաղեցնում են համապատասխանաբար առաջինից չորրորդ տեղերը, սակայն ԱՄՆ-ն ու Անգլիան դեռ պետք է նվաճեն մրցաշարի ուղեգիր։ Զամբյուղները կկազմվեն 2026 թ․ դեկտեմբերի 7-ին հրապարակվելիք վարկանիշի հիման վրա, ուստի այդ դիրքերը կարող են փոխվել։

Քառակի չեմպիոն ԱՄՆ-ը նոյեմբերի 27-ին կհանդիպի Սալվադորին՝ ձգտելով ապահովել իր ուղեգիրը։ Եթե ԱՄՆ-ը հաղթի, իսկ վարկանիշը մնա անփոփոխ, այն կհայտնվի Իսպանիայից հակառակ ուղում․ եթե երկու թիմերն էլ հաղթեն իրենց խմբերում, նրանք կարող են հանդիպել միայն եզրափակչում։ 2023-ի աշխարհի առաջնությունում նրանցից ոչ մեկը չի հաղթել իր խմբում, գրել է The Guardian-ը։

2023-ի փոխչեմպիոն Անգլիան ուղեգիր նվաճելու համար պետք է դեկտեմբերի 1-ին և 5-ին կայանալիք երկու խաղերի արդյունքում հաղթի Ուկրաինային։ Վարկանիշում հինգերորդ տեղում գտնվող Ճապոնիան Անգլիային զիջում է 31 միավորով։ Եթե վարկանիշը մնա անփոփոխ, իսկ թիմերը նվաճեն ուղեգրեր, Ճապոնիան, Ֆրանսիան և Շվեդիան վիճակահանության առաջին զամբյուղում կմիանան ներկայիս առաջին քառյակին և մրցաշարի հյուրընկալող Բրազիլիային։ Շվեդիան դեկտեմբերին փլեյ-օֆֆում կհանդիպի Շոտլանդիային․ առաջին զամբյուղ կարող է տեղափոխվել նաև իններորդ տեղում գտնվող Կանադան։

Ինչպես կանցկացվի վիճակահանությունը

Վիճակահանության համար կկազմվի չորս զամբյուղ՝ յուրաքանչյուրում ութ թիմով։ Բրազիլիային երաշխավորված է տեղ առաջին զամբյուղում և A խմբի A1 դիրքում․ առաջին զամբյուղում նրան կմիանան ուղեգիր նվաճած ամենաբարձր վարկանիշ ունեցող յոթ թիմերը։ Հաջորդ ութ թիմերը կհայտնվեն երկրորդ զամբյուղում, նրանց հաջորդող ութը՝ երրորդում։ Չորրորդ զամբյուղում կլինեն ուղեգիր նվաճած ամենացածր վարկանիշ ունեցող հինգ թիմերը և միջհամադաշնային փլեյ-օֆֆի հաղթողների համար նախատեսված երեք տեղերը։

ՖԻՖԱ-ի ընդհանուր սկզբունքն է հնարավորության դեպքում նույն մայրցամաքային համադաշնության թիմերին տարբեր խմբերում ընդգրկելը։ Բացառություն են եվրոպական թիմերը․ յուրաքանչյուր խմբում պետք է լինի առնվազն մեկ և առավելագույնը երկու այդպիսի թիմ։

Եզրափակիչ վիճակահանությունը նախատեսված է 2026 թ․ դեկտեմբերի 11-ին՝ Ռիո դե Ժանեյրոյի Ժամանակակից արվեստի թանգարանում, տեղական ժամանակով 13:30-ին՝ Երևանի ժամանակով 20:30-ին։ Մրցաշարի վերջին երեք ուղեգրերի տերերը կորոշվեն 2027 թ․ փետրվարի 23-ից մարտի 6-ը միջազգային հանդիպումների համար նախատեսված շրջանում կայանալիք փլեյ-օֆֆի մեկական խաղերում։