Ֆինլանդիան արգելում է ռուս մարզիկների, այդ թվում՝ չեզոքների մուտքը

Ֆինլանդիան հայտարարել է, որ կարգելի ռուս մարզիկների մուտքը երկիր, այդ թվում՝ նրանց, ովքեր չեզոք դրոշի ներքո մրցելու թույլտվություն ունեն։ Արգելքը կվերաբերի նաև սպորտի ոլորտի այլ մասնագետների։ Սահմանափակումներն ուժի մեջ կմտնեն 2026 թ․ նոյեմբերի 16-ին։ Որոշումը հաջորդում է Ռուսաստանի քաղաքացիների ոչ անհրաժեշտ ուղևորությունների արգելքին, որը սահմանվել էր 2022-ին։

Շենգենյան վիզա ունեցող Ռուսաստանի քաղաքացիներին կթույլատրվի աշխատանքային նպատակով մուտք գործել Ֆինլանդիա միայն այն դեպքում, եթե նրանց աշխատանքն էական համարվի երկրի ազգային շահերի համար։ Սպորտի ոլորտում աշխատանքն այդպիսին չի համարվում, գրել է The Moscow Times-ը։

Ֆինլանդիայի արտաքին գործերի նախարար Էլինա Վալտոնենն ասել է, որ ռուս մարզիկները չպետք է մուտք գործեն երկիր, քանի դեռ շարունակվում է Ռուսաստանի պատերազմն Ուկրաինայի դեմ։ Նրա խոսքով՝ նրանց մուտքը կվտանգի Ֆինլանդիայի միջազգային հարաբերությունները։

Մրցելու իրավունքն ու մուտքի թույլտվությունը

Չմշկասահքի միջազգային միությունը, վկայակոչելով Միջազգային օլիմպիական կոմիտեի առաջարկությունները, թույլատրել է ռուս և բելառուս գեղասահորդներին 2026–27 մրցաշրջանում վերադառնալ միջազգային մրցումներ՝ խիստ չեզոք կարգավիճակով։ Ֆինլանդիայի որոշումը նշանակում է, որ ռուս մարզիկների՝ մրցելու իրավունքն ինքնին նրանց երկիր մուտք գործելու թույլտվություն չի տալիս։

Միությունը հայտնել է, որ մարզիկները չպետք է պատժվեն իրենց կառավարությունների գործողությունների համար։ Միությունն ուսումնասիրում է, թե մուտքի սահմանափակումներն ինչ են նշանակում Ֆինլանդիայում անցկացվելիք մրցումների, այդ թվում՝ 2027-ի մարտին կայանալիք գեղասահքի աշխարհի առաջնության համար։

2026 թ․ նոյեմբերի 27–29-ին Ռուկան նախատեսում է ընդունել տղամարդկանց և կանանց դահուկավազքի աշխարհի գավաթի մրցումներ, իսկ նոյեմբերի 28–29-ին՝ տղամարդկանց դահուկացատկի աշխարհի գավաթի մրցումներ։ Դահուկավազքի աշխարհի գավաթի մրցումները նախատեսվում է կրկին անցկացնել Ֆինլանդիայում՝ Լահտիում, 2027 թ․ փետրվարի 12–14-ին։