Google-ը կդադարեցնի Fitbit-ի երրորդ կողմի հավելվածների ներբեռնումն ու թարմացումը

Google-ը նախատեսում է 2026 թ․ նոյեմբերի 28-ից դադարեցնել երրորդ կողմի հավելվածների և ժամացույցի թվատախտակների ներբեռնումն ու թարմացումը Fitbit App Gallery-ում՝ Versa, Versa 2, Versa 3, Versa 4, Sense և Sense 2 խելացի ժամացույցների համար։ Տերերն այլևս չեն կարողանա ավելացնել կամ թարմացնել արտաքին մշակողների ստեղծած բովանդակությունը։

Google-ը հայտնել է, որ արդեն տեղադրված հավելվածներն ու թվատախտակները հասանելի կմնան, սակայն դրանք ջնջելու կամ ժամացույցի գործարանային կարգավորումները վերականգնելու դեպքում վերջնաժամկետից հետո հնարավոր չի լինի կրկին տեղադրել դրանք, գրել է 9to5Google-ը։ Պատկերասրահում կլինեն միայն Fitbit-ի և Google-ի ստեղծած հավելվածներն ու թվատախտակները։

Մշակողների գործիքները կդադարեն գործել

Նույն վերջնաժամկետից կդադարեցվի նաև մշակողների կողմից նոր հավելվածներ ու թվատախտակներ վերբեռնելու կամ առկաները թարմացնելու հնարավորության աջակցությունը։ Google-ը կդադարեցնի նաև Gallery Admin գործիքների աշխատանքը․ մշակողների բովանդակությունը հասանելի կմնա միայն այն արդեն տեղադրած մարդկանց։

Google-ը հայտնել է, որ մինչև վերջնաժամկետը մշակողները կարող են ներբեռնել իրենց առկա նախագծերը կամ խնդրել հեռացնել դրանք պատկերասրահից։