Լոնդոնի ոստիկանություն․ Ֆրանսիայում Ալ Ֆայեդի գործով ձերբակալություններ են արվել

Ֆրանսիայի ոստիկանությունը ձերբակալություններ է արել Փարիզի Ritz հյուրանոցում և «Վինձոր» առանձնատանը, ինչպես նաև Սեն Տրոպեի «Սենտ Թերեզ» առանձնատանը խուզարկություններից հետո։ Այդ մասին ասվում է Լոնդոնի ոստիկանության՝ տուժածներին ուղղված նամակում, որի մասին գրել է BBC-ն։ BBC-ն հայտնել է, որ դրանք Մոհամեդ Ալ Ֆայեդի ենթադրյալ բռնությունների և մարդկանց թրաֆիքինգի հետաքննության շրջանակում առաջին ձերբակալություններն էին։

Harrods-ի և Ritz Paris-ի նախկին սեփականատեր Ալ Ֆայեդն այլևս ողջ չէ՝ քրեական պատասխանատվության ենթարկվելու համար։ Լոնդոնի ոստիկանությունը հետաքննում է այն մարդկանց առնչությունը, որոնք հնարավոր է՝ նպաստել կամ աջակցել են նրա ենթադրյալ հանցագործություններին։

Ֆրանսիայի իշխանությունները հայտնել են, որ մի քանի կասկածյալ է ձերբակալվել, ապա հարցաքննությունից հետո ազատ արձակվել՝ հենց խուզարկությունների ընթացքում առգրավված թվային նյութերը վերլուծելու համար։ Նրանց թիվն ու ինքնությունը չեն բացահայտվել։ «Սենտ Թերեզ» առանձնատունը նախկինում պատկանել է Ալ Ֆայեդին։

Ֆրանսիական և բրիտանական հետաքննությունները

Ֆրանսիայի իշխանությունները հայտնել են, որ իրենց քննիչները հարցաքննել են մի քանի տուժողի և աշխատում են բրիտանական իշխանությունների հետ։ Լոնդոնի ոստիկանությունը հաստատել է, որ իր աշխատակիցները մեկնել են Ֆրանսիա և ներկա գտնվել հոկտեմբերյան գործողությանը։

Լոնդոնի ոստիկանությունն ավելի վաղ հայտնել էր, որ 4 կասկածյալի հարցաքննել է՝ նրանց նախազգուշացնելով իրենց իրավունքների մասին։ Հարցաքննությունը վերաբերել է հնարավոր հանցագործությունների, այդ թվում՝ բռնաբարությանն ու սեռական ոտնձգությանն օժանդակելուն, սեռական հանցագործությունների կատարմանն աջակցելուն և սեռական շահագործման նպատակով մարդկանց թրաֆիքինգին։ Ոստիկանությունը հայտնել էր, որ տուժողների ու վկաների ցուցմունքները, ինչպես նաև Մեծ Բրիտանիայում և արտերկրում համագործակցությունն ընդլայնել են հետաքննության շրջանակը՝ ներառելով մարդկանց թրաֆիքինգը։