Ֆրանսիան թմրանյութերի ապօրինի շրջանառության դեմ նավահանգիստների ցանց է ստեղծել

Ֆրանսիան 2026 թ․ նոյեմբերի 9-ին գործարկել է թմրանյութերի ապօրինի շրջանառության դեմ պայքարի G7+ նավահանգիստների ցանցը։ Այն ստեղծելու առաջարկը հնչել էր հունիսին՝ Էվիանում G7-ի առաջնորդների գագաթնաժողովում։ Առաջնորդներն իրենց հռչակագրում ծովային փոխադրումները համարել էին թմրանյութերի և դրանց պատրաստման համար օգտագործվող նախանյութերի միջազգային ապօրինի շրջանառության հիմնական ուղին։

Ֆրանսիայի արտաքին գործերի նախարարությունը հայտնել է, որ ցանցի առաջին հանդիպումն անցկացվում է Մարսելում՝ Փարիզում նոյեմբերի 9–10-ին անցկացվող G7-ի արտաքին գործերի նախարարների հանդիպմանը զուգահեռ։ Ցանցը միավորում է 14 նավահանգիստ, իսկ G7-ի երկրներից բացի մասնակիցների թվում են նաև Բրազիլիան և Հարավային Կորեան, գրել է gCaptain-ը։ Նախաձեռնությանը մասնակցում են նաև Ինտերպոլը, ՄԱԿ-ի Թմրանյութերի և հանցավորության դեմ պայքարի գրասենյակը, Միջազգային ծովային կազմակերպությունը և Համաշխարհային մաքսային կազմակերպությունը։

Ինչպես է նախատեսվում ցանցի աշխատանքը

Ցանցը նպատակ ունի բարելավել օպերատիվ տեղեկությունների փոխանակումն ու նավահանգստային և մաքսային մարմինների համագործակցությունը, ինչպես նաև ավելի արդյունավետ բացահայտել հանցավոր կազմակերպությունների օգտագործած ծովային փոխադրման երթուղիներն ու բեռնարկղերը։ Նախատեսված աշխատանքները ներառում են փորձի փոխանակում, իրավապահ մարմինների և նավահանգիստների օպերատորների համագործակցության բարելավում, ինչպես նաև միջազգային բեռնափոխադրումների մատակարարման շղթաներում թույլ կետերի բացահայտում։ Նախաձեռնությունը նախատեսում է նաև ջանքեր՝ կանխելու հանցավոր տարրերի ներթափանցումը նավահանգստային մարմիններ և մասնավոր ձեռնարկություններ, ինչպես նաև ուժեղացնելու թմրանյութերի ապօրինի շրջանառությունից ստացված եկամուտների ֆինանսական հետաքննությունները։

Ցանցը մտադիր է իր աշխատանքը համակարգել Եվրոպական նավահանգիստների դաշինքի հետ և առաջնորդվել Միջազգային ծովային կազմակերպության՝ նավերի և նավահանգստային միջոցների անվտանգության միջազգային օրենսգրքով։ Այն ծովում մարդկային կյանքի անվտանգության մասին կոնվենցիայի լրացում է և սահմանում է նավերի, նավահանգիստների և պետական մարմինների անվտանգության նվազագույն պահանջները, այդ թվում՝ սպառնալիքների հայտնաբերման և կանխարգելիչ միջոցներ ձեռնարկելու պարտականությունները։