ՄԱԿ-ի տվյալներով՝ Ռաֆահում կրակոցներից վրաններ են վնասվել, կան վիրավորների մասին տեղեկություններ

Նոյեմբերի 3-ին Գազայի Ռաֆահ քաղաքի հյուսիսում տեղահանվածների ճամբարում կրակոցներից մի քանի վրան է վնասվել, և կան վիրավորների մասին տեղեկություններ, նոյեմբերի 4-ի իր ամփոփագրում հայտնել է ՄԱԿ-ի մարդասիրական օգնության համակարգման գրասենյակը։ Վիրավորների թիվը չի նշվում։

Գրասենյակի խոսքով՝ կրակոցները ստիպել են մարդասիրական մի հասարակական կազմակերպության հեռանալ տարածքից։ Կազմակերպությունն անձրևների սեզոնին ընդառաջ աշխատում էր հեղեղումները կանխելու ուղղությամբ։ Ամփոփագրում չի նշվում, թե երբ այն կարող է վերսկսել աշխատանքները։

Նույն օրը հրաձգային զենքից կրակոցների մասին տեղեկություններ են ստացվել Դեյր ալ Բալահում՝ ՄԱԿ-ի հետ պայմանագրով աշխատող մի օբյեկտի մոտ, և Ռաֆահում՝ ՄԱԿ-ի կազմակերպած ավտոշարասյան մոտ։ Այդ միջադեպերի հետևանքով ՄԱԿ-ի աշխատակիցների տուժելու կամ վնասների մասին տեղեկություններ չեն ստացվել, հայտնել է UN News-ը։

Աջակցություն կացարանի և երեխաների պաշտպանության հարցերում

Հոկտեմբերի վերջին շաբաթվա ընթացքում ՄԱԿ-ն ու նրա գործընկերներն աջակցել են ավելի քան 70 տնային տնտեսության, որոնք ավիահարվածներից մինչև կենցաղային հրդեհներ ընդգրկող միջադեպերի հետևանքով կորցրել էին իրենց կացարաններն ու ունեցվածքը։

Նույն շաբաթվա ընթացքում երեխաների պաշտպանության ոլորտում աշխատող գործընկերները հոգեկան առողջության պահպանման և հոգեսոցիալական աջակցություն են տրամադրել գրեթե 4 500 երեխայի և ավելի քան 2 000 խնամակալի։ Նրանք նաև հայտնաբերել են գրեթե 200 երեխայի, որոնք անհատականացված աջակցության կարիք ունեին։ Նրանցից 20-ը առանց ուղեկցողի էին կամ բաժանվել էին ընտանիքներից, իսկ 17-ը վիրավոր էին։

Գործընկերները նաև աշնանային հագուստ գնելու կտրոններ են տրամադրել ծնողական խնամքից զուրկ ավելի քան 1 000 երեխայի։ Շարունակվում է նաև ավելի քան 2 000 երեխայի հետագա աջակցությունը, որոնց անհատականացված օգնության կարիքը հայտնաբերվել էր ավելի վաղ։

ՄԱԿ-ի գլխավոր քարտուղարի խոսնակ Ստեֆան Դյուժարիկն ասել է, որ քաղաքացիական անձինք, այդ թվում՝ մարդասիրական ոլորտի աշխատակիցները, պետք է պաշտպանված լինեն, իսկ քաղաքացիական օբյեկտները, այդ թվում՝ մարդասիրական օբյեկտներն ու փոխադրամիջոցները, չպետք է վնասվեն։