Գերմանիայի արդարադատության նախարարն առաջարկել է քրեականացնել խոսքային սեռական ոտնձգությունը

Գերմանիայի արդարադատության նախարար Շտեֆանի Հուբիգը ներկայացրել է օրինագիծ, որով կքրեականացվեն սեռական բնույթի խոսքերն ու ժեստերը, որոնք կարող են վախեցնել մեկ այլ անձի կամ ճնշում գործադրել նրա վրա։ Նախագծով առաջարկվում է նաև բարձրացնել որոշ սեռական հանցագործությունների համար սահմանված նվազագույն պատիժները, հայտնել է DW-ն։

Գործող օրենքով մի քանի անձի կատարած սեռական հարձակման կամ սեռական հարկադրանքի համար սահմանված նվազագույն պատիժը 2 տարվա ազատազրկումն է։ Հուբիգի նախագծով այդ նվազագույն ժամկետը կբարձրացվի մինչև 3 տարի, իսկ խմբակային բռնաբարության համար կսահմանվի առնվազն 5 տարվա ազատազրկում։

Ոտնձգությունը և քրեական հետապնդման վաղեմության ժամկետները

Ոտնձգության վերաբերյալ առաջարկվող դրույթը թույլ կտա քրեական մեղադրանք առաջադրել նրան, ով սեռական բնույթի արտահայտությամբ կամ ժեստով անհանգստացնում է մեկ այլ անձի, եթե դա կարող է վախեցնել նրան կամ ճնշում գործադրել նրա վրա։ Հուբիգի նախարարությունն օրինագծում խուսափում է «catcalling»՝ փողոցում սեռական բնույթի խոսքերով անհանգստացնելը նշանակող եզրույթից, քանի որ այն համարում է վիճահարույց և արարքը թերագնահատող։

Նախագծով նաև խմբակային բռնաբարության և սեռական հարձակման համար քրեական հետապնդման վաղեմության միասնական՝ 20 տարվա ժամկետ կսահմանվի։ Գործող ժամկետն առանձին դեպքերում կարող է ընդամենը 5 տարի լինել։

Հուբիգն ասել է, որ սեռական ոտնձգությունն ու սեռական բնույթի բռնությունը չափազանց շատ կանանց առօրյայի մասն են։ Նրա խոսքով՝ պատիժներ են անհրաժեշտ՝ հստակ ցույց տալու համար, որ սեռական հանցագործություններն անընդունելի են՝ անկախ նրանից՝ դրանք ֆիզիկական են, թե խոսքային։

Միջոցառումները դեռ առաջարկի փուլում են։