Warby Parker-ը և Gentle Monster-ը բացել են խելացի ակնոցների նախնական պատվերները

Warby Parker-ը և Gentle Monster-ը նոյեմբերի 12-ին սկսել են Google-ի Android XR հարթակով աշխատող խելացի ակնոցների նախնական պատվերներն ընդունել։ Ակնոցները ներկառուցված էկրան չունեն և աշխատում են ինչպես Android հեռախոսների, այնպես էլ iPhone-ների հետ՝ երկու դեպքում էլ առաջարկելով նույն գործառույթները, հայտնել է Engadget-ը։ Պաշտոնական վաճառքը նախատեսվում է սկսել դեկտեմբերի 10-ին։

Օպերացիոն համակարգն ապահովում է Google-ը, իսկ տեխնոլոգիական բաղադրիչների մեծ մասով, այդ թվում՝ տեսախցիկներով, խոսափողներով ու հպման սենսորներով, զբաղվում է Samsung-ը։ Warby Parker-ը և Gentle Monster-ը նախագծում են ակնոցներն ու ոսպնյակները, ինչպես նաև զբաղվում վաճառքով և հաճախորդների սպասարկմամբ։

Նկարահանման և անձնական կյանքի պաշտպանության միջոցները

Շրջանակի վրայի լույսը ցույց է տալիս, թե երբ է ակնոց կրողը լուսանկարում կամ տեսագրում։ Google-ը հայտնել է, որ սենսորները հայտնաբերում են, երբ լույսը ծածկված կամ խափանված է և արգելափակում նկարահանումը։ Google-ի XR ուղղության ղեկավար Ջասթոն Փեյնը մեթոդներն արդյունավետ է անվանել, սակայն դրանց արդյունավետությունը դեռ անկախ ստուգում չի անցել։ Նա ընդունել է, որ մարդիկ պաշտպանության միջոցները շրջանցելու ճանապարհներ կգտնեն, և ասել է, որ Google-ը կփորձի վերացնել այդ բացերը։

Google-ի խոսքով՝ իր Gemini գերբանականության (ԳԲ) օգնականը կարող է օգտագործել տեսախցիկը՝ արձագանքելու ակնոց կրողի տեսածին։ Ընկերությունը հայտնել է, որ այդ պատկերները չեն պահվում Gemini-ի պատմության մեջ, իսկ ակնոցները նախագծված են այնպես, որ անցորդների դեմքերը ծածկվեն մինչև Gemini-ի կողմից պատկերների մշակումը։ Google-ը հայտնել է, որ տեսախցիկի պատկերահոսքը չի օգտագործվի ԳԲ-ն վարժեցնելու կամ գովազդը թիրախավորելու համար, իսկ ակնոցից դուրս մշակման ուղարկվող տվյալները փոխանցման ընթացքում գաղտնագրվում են։