Հարվարդը 4 տարվա արշավից հետո 2 գանգ է վերադարձրել Բրազիլիային

Հարվարդի համալսարանի հնագիտության և ազգագրության Փիբոդիի թանգարանը 4 տարի տևած արշավից հետո Բրազիլիային է վերադարձրել 2 գանգ։ Աճյունները 19-րդ դարից ի վեր Բրազիլիայից դուրս էին և Հարվարդում օգտագործվել էին ռասիստական եվգենիկայի հետազոտություններում։

Մարդկանց ինքնությունը հայտնի չէ։ Ենթադրվում է, որ գանգերը պատկանել են աֆրիկացիների կամ աֆրոբրազիլացիների, հավանաբար՝ ստրկացված մարդկանց, սակայն այդ հանգամանքները վերջնականապես հաստատված չեն։ Բրազիլացի հետազոտողները կքննեն աճյունները՝ նախքան հուղարկավորությունը։

Արշավն ու վերադարձը

Գանգերի գոյության մասին հայտնի է դարձել 2022 թվականին։ Բրազիլացի հետազոտողները ձգտել են վերադարձնել դրանք և ասել են, որ գործընթացն առաջ է շարժվել միայն 2024 թվականի վերջին Բրազիլիայի կառավարության ներգրավվելուց հետո, գրել է The Guardian-ը։ Կառավարության պաշտոնյա Կարոլինա Դիաս դոս Ռեյսը մեկնել է Բոստոն՝ Հարվարդի հետ համաձայնագիրը ստորագրելու։ Նա ասել է, որ վերադարձը կարևոր էր այդ մարդկանց արժանապատվությունը վերականգնելու համար, որից նրանք զրկվել էին թե՛ կենդանության օրոք, թե՛ մահից հետո։

Դիվանագետները յուրաքանչյուր գանգ ինքնաթիռով տեղափոխել են փափուկ միջադիրներով տուփի մեջ՝ ամրացված ճամպրուկում։ Աճյունների վերադարձը նշվել է Սալվադորում և Ռիո դե Ժանեյրոյում կազմակերպված արարողություններով։ Ռիոյի ազգային թանգարանում պատմության պրոֆեսոր և կանդոմբլե կրոնի հոգևորական Իվանիր դոս Սանտոսը ջուր է լցրել գետնին, երբ հետազոտողները ստացել են ճամպրուկը։ Նա ասել է, որ այդ արարքով հարգել է նախնու հիշատակը, որը դեռ կենդանի է, և որ աճյունը պարզապես հետազոտության առարկա չէ։

Ինչ է հայտնի աճյունների մասին

Ենթադրվում է, որ Սալվադոր վերադարձված գանգը պատկանել է մի տղամարդու, որը մասնակցել է 1835 թվականի ապստամբությանը, երբ աֆրիկացի մահմեդականները փորձել են գրավել քաղաքը։ Ենթադրվում է, որ ԱՄՆ դիվանագետ Գիդեոն Թ. Սնոուն տղամարդու՝ հիվանդանոցում մահանալուց հետո գանգն ուղարկել է Բոստոն։ Բահիայի իսլամական մշակույթի կենտրոնը, որը պայքարել է գանգի վերադարձի համար, նրան անվանել է Արակունրին, ինչը յորուբա լեզվով նշանակում է եղբայր։ Նրա պատմական ինքնությունը, սակայն, հաստատված չէ։