Միջազգային ծովային կազմակերպություն․ 2026-ին հակամարտություններում առնվազն 66 նավաստի է զոհվել

2026-ին հակամարտություններում առնվազն 66 նավաստի է զոհվել, Al Jazeera-ին տրամադրած հայտարարության մեջ հայտնել է Միջազգային ծովային կազմակերպությունը։ Կազմակերպության խոսքով՝ ևս հարյուրավոր մարդիկ վիրավորվել են։ Al Jazeera-ի հաղորդմամբ՝ շատ նավաստիներ անհետ կորած են, և մտավախություն կա, որ նրանք զոհվել են։

Այս վտանգներն առաջացել են 2022-ին Ուկրաինա Ռուսաստանի լայնամասշտաբ ներխուժումից և Իրանի դեմ ԱՄՆ-ի ու Իսրայելի պատերազմից հետո, որը սկսվել է 2026-ի փետրվարին։ Սև ծովում և Հորմուզի նեղուցում նավերի վրա հարձակումների հետևանքով նավաստիներ են զոհվել։

Անձնակազմերին պաշտպանելու կոչ

Տրանսպորտի աշխատողների միջազգային ֆեդերացիայի՝ Մեծ Բրիտանիայում ներկայացուցիչ Թոնի Փաթենն ասել է, որ հակամարտություններն ու աշխարհաքաղաքական փոփոխությունները խորացրել են ծովում աշխատող մարդկանց առջև ծառացած խնդիրները։ Նրա խոսքով՝ ծովում աշխատող մարդկանց համար սարսափելի տարի է եղել։ Ֆեդերացիան զբաղվում է նավաստիների իրավունքների պաշտպանությամբ։

Միջազգային ծովային կազմակերպության գլխավոր քարտուղար Արսենիո Դոմինգեսը կոչ է արել անդամ երկրներին զերծ մնալ առևտրային նավերն ու դրանց անձնակազմերին վտանգող գործողություններից։ Նա պատվիրակներին հորդորել է իրենց կառավարությունների և միջազգային մարմինների հետ քննարկել հակամարտությունների ազդեցությունը նավագնացության վրա։ Կազմակերպության խոսքով՝ նավագնացության խափանումներն ազդում են նաև տնտեսությունների, մատակարարման շղթաների և առօրյա կյանքի վրա։