Հնդկաստանի կիբերանվտանգության գործակալություն․ Քրաֆթի Ֆալքոնը ներխուժել է ֆինանսական ընկերություններ

Քրաֆթի Ֆալքոն կոչվող խումբը ներխուժել է հնդկական ոչ բանկային վարկատուների, ֆինտեխ ընկերությունների և կրիպտոարժույթի բորսաների համակարգեր։ Հնդկաստանի կիբերանվտանգության գործակալությունը նոյեմբերի 4-ի նախազգուշացման մեջ հայտնել է, որ հարձակումները շարունակվում են։ Գործակալության խոսքով՝ հարձակվողները գումար փոխանցելու համար օգտագործում են տուժողների սեփական վճարումների և միջոցների տրամադրման համակարգերը։

Հնդկաստանի կիբեռանվտանգության ազգային գործակալությունը (CERT-In) նախազգուշացումը հրապարակել է ավելի վաղ ահազանգերից և ֆինանսական ընկերությունների դեմ մի շարք հարձակումներից հետո։ Գործակալության խոսքով՝ որոշ ընկերություններ կրկին հարձակման են ենթարկվել թերություններն ամբողջությամբ չշտկելուց հետո։

CERT-In-ի խոսքով՝ հանրությանը հասանելի գերբանականության (ԳԲ) գործիքներն ավտոմատացնում են ներխուժումները՝ դրանք կատարելով «մեքենայական արագությամբ»։ Գործակալությունն առանձնացրել է ARTEX, PentAGI, Cairn և CyberStrikeAI գործիքները։ Այն նաև հայտնել է, որ խումբը թիրախներն ուսումնասիրում է մեքենայական բանականության միջոցով։

Թիրախում՝ վճարային համակարգերը

Հավելվածների ծրագրավորման միջերեսները՝ API-ները, ծրագրային կապեր են, որոնք կարող են միացնել բանկերը վարկատուներին և ֆինտեխ ընկերություններին՝ վարկերի տրամադրման հրահանգներ ուղարկելու համար։ Հնդկաստանի կիբերհանցագործությունների համակարգման կենտրոնը մեկ այլ նախազգուշացման մեջ հայտնել է, որ հարձակվողներն օգտվում են չշտկված ծրագրային խոցելիություններից կամ համակարգերի սխալ կարգավորումներից, ապա թիրախավորում վճարումների և փոխանցումների API-ները կամ միջոցների տրամադրման ավտոմատացված համակարգերը։

CERT-In-ի խոսքով՝ հարձակումներն իրականացվել են տոնական օրերին, շաբաթ-կիրակի օրերին և այլ ժամանակահատվածներում, երբ վերահսկողությունն ավելի թույլ է, որպեսզի հայտնաբերումն ուշանա։ Գործակալությունը չի նշել տուժած ընկերությունների անունները, գողացված գումարի չափը կամ այն, թե առանձին հաղորդված միջադեպերից որոնք են կապված Քրաֆթի Ֆալքոնի հետ։