Իրանն ահաբեկչական է ճանաչել Արգենտինայի ռազմածովային և ռազմաօդային ուժերը

Իրանն Արգենտինայի ռազմածովային և ռազմաօդային ուժերը ճանաչել է ահաբեկչական կազմակերպություններ, նոյեմբերի 11-ին հայտարարել է Իրանի արտաքին գործերի նախարարությունը։ Այն որոշումն անվանել է փոխադարձ քայլ՝ Արգենտինայի կողմից Իրանի Իսլամական հեղափոխության պահապանների կորպուսին ահաբեկչական ճանաչելուց հետո։

Նախարարությունը հայտարարել է, որ որոշումից բխող բոլոր հետևանքների պատասխանատվությունը կկրի Արգենտինայի կառավարությունը, սակայն չի հստակեցրել դրա կիրառման գործնական միջոցներն ու հետևանքները։ Հայտարարության մեջ Արգենտինայի ցամաքային զորքերը չեն հիշատակվել, գրել է CNA-ն։

Արգենտինայի ավելի վաղ որոշումը

Արգենտինայի նախագահի գրասենյակը 2026 թ․ մարտի 31-ին հայտարարել էր Իսլամական հեղափոխության պահապանների կորպուսն ահաբեկչական ճանաչելու մասին։ Կորպուսը պաշտպանում է Իրանում շիա մահմեդական հոգևորականների իշխանությունը և վերահսկում երկրի տնտեսության զգալի մասը։

Արգենտինայի անվտանգության և արտաքին գործերի նախարարությունները կորպուսի գրանցումը երկրի ահաբեկչության և դրա ֆինանսավորման հանրային ռեեստրում պաշտոնապես ձևակերպել են 2026 թ․ ապրիլի 6-ին պաշտոնական տեղեկագրում հրապարակված համատեղ որոշմամբ։ Նախագահի գրասենյակի խոսքով՝ գրանցումը հնարավորություն է տալիս կիրառելու ֆինանսական պատժամիջոցներ և գործառնական սահմանափակումներ, որոնք նպատակ ունեն սահմանափակելու կորպուսի գործունեությունն Արգենտինայում և պաշտպանելու երկրի ֆինանսական համակարգն ապօրինի օգտագործումից։

Արգենտինան իր որոշումը կապել է Լիբանանում գործող «Հեզբոլլահ» խմբավորմանը կորպուսի աջակցության հետ։ Արգենտինան խմբավորմանն է մեղադրում 1994 թ․ հուլիսի 18-ին Բուենոս Այրեսում AMIA հրեական համայնքային կենտրոնի պայթյունի համար։ Հարձակման հետևանքով զոհվել է 85 մարդ, ավելի քան 300-ը վիրավորվել են, հայտնել է Արգենտինայի նախագահի գրասենյակը։ Այն նաև հայտարարել է, որ դատական քննությունների և հետախուզական աշխատանքի արդյունքում պարզվել է՝ իրանցի բարձրաստիճան պաշտոնյաներն ու հեղափոխության պահապանների օպերատիվ աշխատակիցներն անմիջականորեն մասնակցել են այդ հարձակմանը և 1992 թվականին Բուենոս Այրեսում տեղի ունեցած մեկ այլ հարձակման։