Իրանի զինված ուժեր․ Հորմուզի նեղուցի մոտ 5 տանկեր և քարշակ են այրվել

Իրանի զինված ուժերի խոսքով՝ գիշերը և նոյեմբերի 5-ին Հորմուզի նեղուցում և դրա մերձակայքում տեղի ունեցած առանձին միջադեպերի հետևանքով 5 նավթատար տանկեր և մեկ քարշակ են այրվել։ Նրանց հաղորդածի համաձայն՝ տանկերներից 4-ն այրվել է ականների հարվածից։

Փետրվարի վերջին Իրանի դեմ պատերազմի սկսվելուց ի վեր Իրանը խիստ սահմանափակել է նեղուցով երթևեկությունը։ Սովորաբար այդ ջրուղով է տեղափոխվում աշխարհում սպառվող նավթի մոտ 20%-ը, հայտնել է Al Jazeera-ն։

Ինչ են հայտնել Իրանի զինված ուժերը

Իրանի իսլամական հեղափոխության պահապանների կորպուսը Fars լրատվական գործակալությանը հայտնել է, որ նախորդ գիշեր մեծ տանկերն ականի է բախվել, այրվել և կանգ առել՝ փորձելով անցնել նեղուցից հարավ ընկած ճանապարհով, որը կորպուսն անօրինական է բնութագրել։

Հեղափոխության պահապանների կորպուսի խոսքով՝ մեկ այլ գերտանկեր նեղուցի արևելյան հատվածից դուրս գալիս կանգ է առել հրդեհի պատճառով, իսկ կրակը մարելու համար մոտեցած քարշակը նույնպես այրվել է։ Կորպուսը չի հայտնել երկու հրդեհների պատճառները։

Իրանի բանակը, որը հայտնի է որպես Արթեշ և Հեղափոխության պահապանների կորպուսից առանձին գործող կանոնավոր զինված ուժ է, հայտնել է, որ նոյեմբերի 5-ի վաղ առավոտյան նեղուցից արևելք՝ իր բնութագրմամբ ոչ անվտանգ տարածքում, տանկերը բախվել է ծովային ականի, այրվել և կանգ առել։ Իրանի սահմանադրության համաձայն՝ բանակը պաշտպանում է երկրի անկախությունն ու տարածքային ամբողջականությունը, իսկ Հեղափոխության պահապանների կորպուսը՝ իսլամական հեղափոխությունն ու դրա նվաճումները։ Ավելի ուշ տարածած հայտարարության մեջ բանակը հայտնել է, որ կեսօրին մոտ նեղուցից արևելք ընկած՝ իր բնութագրմամբ ոչ անվտանգ ջրերում ևս 2 տանկեր է բախվել ծովային ականների և այրվել։ Պաշտոնական IRNA լրատվական գործակալությունը հրապարակել է երկու հայտարարություններն էլ։

Նավերի ինքնությունը չի հրապարակվել, տուժածների մասին տեղեկություններ և միջադեպերի անկախ հաստատում չկան։