Կարմիր խաչ․ Իսրայելը վերսկսել է պաղեստինցի կալանավորվածների ցուցակների տրամադրումը

Իսրայելը վերսկսել է օկուպացված Հորդանան գետի արևմտյան ափից և Գազայից պաղեստինցի կալանավորվածների ցուցակների տրամադրումը Կարմիր խաչի միջազգային կոմիտեին։ Դա կազմակերպության խոսնակը հաստատել է հոկտեմբերի 25-ին Fortune-ում հրապարակված նյութում։ Տեղեկությունների տրամադրման վերականգնումը չի նշանակում, որ կազմակերպությունը կրկին բանտեր այցելելու հնարավորություն է ստացել։

Իսրայելի Գերագույն դատարանը 2026-ի ավելի վաղ կայացրած որոշմամբ կառավարությանը պարտավորեցրել է վերսկսել թե՛ ցուցակների տրամադրումը, թե՛ Կարմիր խաչի միջազգային կոմիտեի այցելությունները՝ կալանավորվածների պայմանները գնահատելու համար։ Կառավարությունը երկուսն էլ կասեցրել էր «Համասի» գլխավորությամբ 2023-ի հոկտեմբերի 7-ին իրականացված հարձակումներից և Գազայի պատերազմի մեկնարկից հետո։

Կարմիր խաչի միջազգային կոմիտեի խոսնակ Գիլադ Գրոսմանն ասել է, որ Իսրայելը դեռ թույլ չի տվել վերսկսել բանտեր այցելությունները։ Կալանավորվածների ցուցակների ստացմամբ վերականգնվում է կազմակերպության՝ տեղեկություններ ստանալու ուղին, սակայն դրա աշխատակիցները չեն կարող մտնել բանտեր՝ պայմանները գնահատելու համար։

Դեռ պարզ չէ, թե երբ է վերսկսվել ցուցակների տրամադրումը և որքանով են դրանք ամբողջական։ Գրոսմանն ասել է, որ Կարմիր խաչի միջազգային կոմիտեն հույս ունի մոտ ապագայում վերսկսել բանտեր այցելությունները։