Տեխնոյի ստեղծմանն ու անվանմանը նպաստած Խուան Աթկինսը մահացել է 64 տարեկանում

64 տարեկանում մահացել է Խուան Աթկինսը, որի ձայնագրությունները Cybotron-ի կազմում և Model 500 անունով նպաստել են դետրոյթյան տեխնոյի կայացմանը։ Նա կոշտ, մեքենայական հնչողությամբ էլեկտրոնային պարային երաժշտության ռահվիրա էր և առաջինն էր, որ այն անվանեց «տեխնո», գրել է Guardian-ը՝ նոյեմբերի 1-ի հրապարակման մեջ։

Աթկինսի գործակալությունը՝ Greensmith Artists-ը, նրա մահը հաստատել է պարային երաժշտության Resident Advisor կայքին։ Գործակալությունը հայտնել է, որ նախատեսված ելույթից առաջ նրան անարձագանք վիճակում գտել են Մեխիկոյի հյուրանոցներից մեկի սենյակում, իսկ հիվանդանոց տեղափոխելուց հետո արձանագրել են մահը։

Նրա հիմնարար աշխատանքը սկիզբ է առել Միչիգան նահանգի Բելվիլ քաղաքում հաստատված ընկերությունից, որտեղ նա ծանոթացել է երաժիշտներ Դերիկ Մեյի և Քևին Սաունդերսոնի հետ։ Նրանք հայտնի դարձան որպես Բելվիլի եռյակ և նպաստեցին, որ Դետրոյթը դառնա էլեկտրոնային երաժշտության կենտրոն։

Հնչողության ստեղծումն ու անվանումը

Աթկինսը 1980 թվականին Ռիչարդ Դևիսի հետ հիմնադրել է Cybotron-ը։ Երկու երաժիշտները սինթեզատորները՝ ձայն առաջացնող էլեկտրոնային գործիքները, համադրել են էլեկտրոնային հարվածային գործիքների և ապագային վերաբերող թեմաների հետ։ Նրանց 1983 թվականի «Clear» ստեղծագործությունը դարձավ Դետրոյթում ձևավորվող հնչողությունը բնորոշող ձայնագրություններից մեկը։

Ապագային վերաբերող գաղափարները միայն գիտաֆանտաստիկայից չէին գալիս։ Աթկինսն ասել է, որ արդյունաբերական հասարակությունից տեխնոլոգիականին անցնելու մասին դասընթացն ազդել է իր երաժշտության վրա։ Նա նաև ասել է, որ իր երգերի բառերով նպատակ ուներ հասարակական թեմաների անդրադառնալ՝ ունկնդիրներին պարի և սիրավեպի սահմաններից դուրս մտածելու նյութ տալով։

Cybotron-ից հեռանալուց հետո Աթկինսը ձայնագրություններ է թողարկել Model 500 անունով։ Նրա 1985 թվականի «No UFOs» ստեղծագործությունը համադրում էր մեքենայական ռիթմերը գիտաֆանտաստիկայից ներշնչված մեղեդային մթնոլորտի հետ և դարձավ դետրոյթյան տեխնոյի հիմնարար թողարկումներից մեկը։ Նույն թվականին նա հիմնադրել է Metroplex լեյբլը՝ իր երաժշտությունը թողարկելու համար։ Հետագայում լեյբլը թողարկել է նաև դետրոյթցի այլ երաժիշտների, այդ թվում՝ Էնթոնի Շաքիրի և Դիջեյ Բոունի գործերը։