Բավարիայի ոստիկանությունը հայտնել է «Արծվի բնում» խոշոր հրդեհի մասին

Բավարիայի ոստիկանության հաղորդմամբ՝ հոկտեմբերի 23-ի երեկոյան Գերմանիայի հարավում՝ Բավարիայի Բերխտեսգադեն քաղաքում, կրակը պատել է Քելշտայնհաուսը, որը հայտնի է նաև որպես «Արծվի բույն»։ Հոկտեմբերի 24-ին Guardian-ը հայտնել է, որ Բավարիայի ներքին գործերի նախարար Յոախիմ Հերմանի խոսքով՝ երկրամասը մտադիր է վերականգնել պատմական շենքը։

Պահպանության տակ գտնվող շենքը նացիստական բռնապետ Ադոլֆ Հիտլերի լեռնային հանգստավայրն էր։ Այն Երկրորդ համաշխարհային պատերազմի ռմբակոծություններից անվնաս է մնացել։ Մինչև հրդեհը շենքում գործում էին ռեստորան և Ժամանակակից պատմության ինստիտուտի՝ շենքի նացիստական անցյալի մասին ցուցահանդեսը, որոնք այնտեղ տեղակայված էին 1952 թվականից։ Ըստ Guardian-ի՝ ոստիկանության խոսնակը Bild-ին հայտնել է, որ շենքը մեծ վնասներ է կրել, և այն, հավանաբար, չի հաջողվի փրկել։

Բավարիան մտադիր է վերականգնել պատմական շենքը

Քելշտայնհաուսը Բավարիայի երկրամասի կառավարության սեփականությունն է։ Guardian-ի փոխանցմամբ՝ պաշտոնյաները նշել են, որ վերականգնումը կսկսվի տեղական պաշտոնյաների, պատմաբանների և պատմական շենքերի ու առարկաների պահպանության մասնագետների հետ քննարկումներից հետո։

«Մենք այնտեղ ավերակ չենք թողնելու»,— լրագրողներին ասել է Հերմանը։ Նա կարևորել է «հիշողության պահպանման աշխատանքը» շարունակելը՝ շենքը վերականգնելու հանձնառությունը կապելով դրա նացիստական անցյալը ներկայացնելու դերի հետ։

Հրդեհը, ըստ երևույթին, մարվել է

Guardian-ի փոխանցմամբ՝ հոկտեմբերի 24-ի առավոտյան հրդեհը, ըստ երևույթին, արդեն մարվել էր, թեև շենքից շարունակում էր ծուխ բարձրանալ։ Ոչ ոք չի տուժել, իսկ հրշեջները ներսում ոչ ոքի չեն հայտնաբերել։ Ոստիկանությունը փակել է հանգստավայր տանող ճանապարհը։

Դժվարամատչելի տեղանք և շարունակվող քննություն