Ռումինիայի նախագահը Ռուսաստանին է մեղադրում «Խորիվի»՝ մարդկային զոհով խորտակման համար

Հոկտեմբերի 23-ին Ռումինիայի նախագահ Նիկուշոր Դանը Ռուսաստանին է մեղադրել անօդաչու թռչող սարքի հարվածի համար, որի հետևանքով Ռումինիայի տարածքային ջրերի մերձակայքում խորտակվել է «Խորիվ» առևտրային նավը։ Այս մասին գրել է DW-ն։ Դանը հայտնել է, որ ուկրաինացիներից և ադրբեջանցիներից կազմված 13-հոգանոց անձնակազմից առնվազն մեկ նավաստի զոհվել է, երեքը՝ անհետ կորել։ Անձնակազմի ինը անդամ փրկվել է։

Փրկվածների թվում են եղել նավի անձնակազմի երեք ադրբեջանցի անդամները։ Այս մասին հոկտեմբերի 26-ին գրել է JAMnews-ը։

Փրկված նավաստիներից մեկը բժշկական օգնություն է ստացել

Փրկված երեք ադրբեջանցի նավաստիներից մեկը Ռուֆան Ահմադովն է։ Ադրբեջանի արտաքին գործերի նախարարության տեղեկությամբ՝ նա թեթև վնասվածքներ է ստացել, բժշկական զննություն անցել և տեղավորվել հյուրանոցում։

Նախորդ հարձակումները և ՆԱՏՕ-ի արձագանքը

Հոկտեմբերին կտրուկ աճել է Սև ծովի արևմտյան հատվածով ուկրաինական հացահատիկ և այլ բեռներ արտահանել փորձող նավերի վրա ռուսական հարվածների թիվը, գրել է DW-ն։ «Խորիվի» խորտակումից մոտ երկու շաբաթ առաջ այդ շրջանում երկու առևտրային նավ էր հրկիզվել։ Դրանցից մեկը Ռումինիայի տարածքային ջրերում էր, իսկ «Խորիվը» խորտակվել է այդ ջրերի մերձակայքում։

Հյուսիսատլանտյան դաշինքի (ՆԱՏՕ) անդամներ Ռումինիան և Բուլղարիան առևտրային նավերի վրա հարձակումների համար մեղադրել են Ռուսաստանին և կոչ արել ուժեղացնել նավերի պաշտպանությունը։ ՆԱՏՕ-ն հայտարարել է, որ Սև ծով է ուղարկում լրացուցիչ ծովային պարեկային ինքնաթիռներ և ռադարային համակարգեր, սակայն հարձակումների համար որևէ երկրի չի մեղադրել։