ՄԱԿ․ Լիբանանում ավելի քան մեկ միլիոն մարդ սննդի սուր պակասի է բախվում

Լիբանանում ավելի քան մեկ միլիոն մարդ՝ բնակչության գրեթե քառորդը, բախվում է սննդի սուր պակասի, հայտնել է ՄԱԿ-ը։ Կազմակերպությունը դրա պատճառ է համարում երկու տարուց պակաս ժամանակահատվածում տեղի ունեցած երկու հաջորդական հակամարտություններն ու երկրի ծանր տնտեսական վիճակը։

ՄԱԿ-ի Պարենի և գյուղատնտեսության կազմակերպությունը, Պարենի համաշխարհային ծրագիրը և Լիբանանի գյուղատնտեսության նախարարությունը կանխատեսում են, որ մինչև 2027-ի կեսը տուժածների թիվը կհասնի 1,15 միլիոնի, հայտնել է Al Jazeera-ն։ Նրանց համատեղ հայտարարությունը հրապարակվել է այն ժամանակ, երբ Լիբանանը դեռևս փորձում է վերականգնվել 2019-ին սկսված տնտեսական ճգնաժամից։

Որոշ տնային տնտեսությունների հնարավորությունները սպառվում են

Գործակալություններն ու նախարարությունը հայտնել են, որ աշխատանք գտնելու հնարավորությունները շարունակում են սահմանափակ մնալ, խնայողությունները սպառվել են, իսկ պարտքերը՝ մեծ։ Միևնույն ժամանակ սննդի, վառելիքի և առաջին անհրաժեշտության այլ ապրանքների գները ծանրաբեռնում են տնային տնտեսությունների բյուջեները։

Լիբանանում Պարենի համաշխարհային ծրագրի ներկայացուցիչ և երկրի գծով տնօրեն Ալիսոն Օման Լաուին ասել է, որ որոշ տնային տնտեսություններ դեռ կարող են սնունդ գնելու համար օգտվել խնայողություններից, պարտք վերցնել կամ կրճատել ծախսերը, սակայն մյուսների համար այդ հնարավորությունները սպառվում են։ Նա զգուշացրել է, որ երբ ընտանիքներն այլևս հենվելու ոչինչ չունեն, նույնիսկ փոքր լրացուցիչ ցնցումը կարող է խորացնել նրանց ճգնաժամը։

Իսրայելի և լիբանանյան «Հեզբոլլահ» զինված խմբավորման միջև վերջին պատերազմը սկսվել է 2026-ի մարտին և Լիբանանում ավելի քան մեկ միլիոն մարդու տեղահանության պատճառ դարձել։ Հունիսին բռնությունների նվազումից հետո տեղահանվածների թիվը կրճատվել է՝ հասնելով մոտ 300 000-ի։

Լիբանանի գյուղատնտեսության նախարար Նիզար Հանին կոչ է արել համակարգված ազգային միջոցներ ձեռնարկել՝ սննդի հրատապ կարիքները բավարարելու, միաժամանակ մարդկանց ապրուստի միջոցները պաշտպանելու և սնունդ արտադրելու կարողությունը վերականգնելու համար։