Նավախոյի ջրամբարի մակարդակը բարձրացել է գրեթե 60 ոտնաչափով

Նավախոյի ջրամբարի մակարդակը 2026 թ․ սեպտեմբերի 20-ից նոյեմբերի 7-ը բարձրացել է գրեթե 60 ոտնաչափով (18 մետր)՝ հասնելով 2019-ի օգոստոսից ի վեր ամենաբարձր կետին, հայտնել է ՆԱՍԱ-ն՝ վկայակոչելով ԱՄՆ-ի բանակի ինժեներական կորպուսի չափումները։ Նյու Մեքսիկոյի հյուսիսում և Կոլորադոյի հարավում գտնվող ջրամբարի մակարդակը գարնանը քիչ էր բարձրացել՝ անսովոր քիչ ձյուն տեղացած ձմռանից հետո, թեև գարնանը ձնհալը հաճախ բարձրացնում է ջրի մակարդակը։

Ջրամբարում պահվող ջրի ծավալը սեպտեմբերի այդ օրվա միջին ցուցանիշի 60%-ից հասել է նոյեմբերի համապատասխան օրվա միջինի 108%-ին։ Այս թվերը ջրի ծավալը համեմատում են յուրաքանչյուր օրվա սովորական ցուցանիշի, ոչ թե ջրամբարի առավելագույն տարողության հետ։

Ջրամբարում կուտակվում է Սան Խուան գետի ջուրը, որն օգտագործվում է տեղական ոռոգման համար։ Ջրամբարից բաց թողնված ջուրը կարող է հոսանքով ներքև հասնել նաև Յուտա նահանգի Կոլորադո գետ։

Անձրևները լցրել են ջրամբարն ու հեղեղել բնակավայրերը

Հոկտեմբերի վերջին և նոյեմբերի սկզբին տեղացած հորդառատ անձրևներից Սան Խուան, Պիեդրա և այլ գետերը վարարել են՝ արագ բարձրացնելով ջրամբարի մակարդակը, հայտնել է ՆԱՍԱ-ն։ Համեմատության համար գործակալությունն օգտագործել է Landsat 9 արբանյակի պատկերները։ Համեմատվող ժամանակահատվածից առաջ՝ սեպտեմբերի 16-ին և 17-ին, ԱՄՆ-ի ջրային ռեսուրսների կառավարման բյուրոն կրճատել էր Նավախոյի ամբարտակից բաց թողնվող ջրի ծավալը։

Ջրային ռեսուրսների կառավարման բյուրոյի՝ ջրամբարի վերաբերյալ առանձին տվյալները նախնական են և կարող են վերանայվել ու փոփոխվել։

Փոթորիկները նաև ավերիչ ջրհեղեղների պատճառ են դարձել․ տեղ-տեղ գետերի մակարդակը հասել է ռեկորդային կամ դրան մոտ բարձրության։ Հատկապես տուժել է Կոլորադո նահանգի Պագոսա Սփրինգս քաղաքը․ իշխանությունները տարհանում են կարգադրել, փրկարարները տասնյակ մարդկանց են փրկել, իսկ ջուրը հեղեղել է փողոցներն ու վնասել գույքը։