ԱՄՆ Պենտագոնը Rocket Lab-ին $150 միլիոնի պայմանական վարկ է խոստացել

ԱՄՆ Պենտագոնի ռազմավարական կապիտալի գրասենյակը նոյեմբերի 10-ին հայտարարել է Rocket Lab-ին $150 միլիոնի պայմանական վարկ տրամադրելու պարտավորության մասին։ Առաջարկվող ֆինանսավորումը տիեզերական արձակումներով զբաղվող ընկերությանը հնարավորություն կտա ընդլայնել Neutron հրթիռի հետ կապված կարողությունները։

Պենտագոնը գրասենյակը ստեղծել է 2022-ին՝ ազգային անվտանգության համար կենսական համարվող տեխնոլոգիաներ մշակող ընկերություններին կապիտալ տրամադրելու նպատակով։

Դրանից առաջ՝ հոկտեմբերի 26-ին, հայտարարվել էր Stoke Space-ին առանձին՝ $150 միլիոնի պայմանական վարկ տրամադրելու մասին՝ Ֆլորիդայի Կանավերալ հրվանդանի տիեզերական ուժերի կայանում երկրորդ արձակման հարթակի կառուցմանն աջակցելու նպատակով։ Երկու վարկերն էլ նպատակ ունեն օգնել ընկերություններին հրթիռները պատրաստել ռազմական արձակումների կարիքների համար, գրել է Ars Technica-ն։

Արտադրության և վերադարձման ծրագրերը

Գրասենյակի խոսքով՝ առաջարկվող վարկը հնարավորություն կտա արդիականացնել արտադրությունը՝ ավելացնելով կոմպոզիտային կառուցվածքների և շարժիչների թողարկումը։ Այն նաև կօգնի արագացնել հրթիռների առաքումն ու նախապատրաստումը և Rocket Lab-ին թույլ կտա ավելացնել Neutron-ի վերադարձման ու տեղափոխման համար նախատեսված նավերն ու սարքավորումները։

Ֆինանսավորումը կաջակցի այն ենթակառուցվածքներին, որոնք կկրճատեն արձակումների միջև ընկած ժամանակը՝ Neutron-ի շահագործման անցնելուց հետո, հայտնել է գրասենյակը։ Neutron-ը միջին բեռնատարողության, երկաստիճան հրթիռ է, որը նախատեսված է մասնակի բազմակի օգտագործման համար։ Rocket Lab-ի խոսքով՝ դրա առաջին արձակումը նախատեսված է 2027-ին։

Ֆինանսավորման նախապայմանները

Պարտավորությունը չի նշանակում, որ գումարն արդեն տրամադրվել է։ Գրասենյակի խոսքով՝ առաջարկվող վարկը դեռ ենթակա է ֆինանսական, իրավական, տեխնիկական, ներդրումային, պատշաճ ուսումնասիրության և այլ պահանջների կատարմանը։ Պատշաճ ուսումնասիրությունը ֆինանսավորման գործարքի ավարտից առաջ իրականացվող ստուգումն է։