Պերուն $5 միլիոն է նախատեսում Ռոնդոկանի եկեղեցու պահպանման համար

Պերուի մշակույթի նախարարությունը և Getty-ի պահպանման ինստիտուտը համատեղ կաշխատեն Կուսկոյի շրջանի Ռոնդոկան բնակավայրում գտնվող՝ 17-րդ դարի Սանտո Տոմաս դե Ակինոյի եկեղեցու պահպանման ուղղությամբ։ $5 միլիոն արժողությամբ ծրագիրը կֆինանսավորի կառավարությունը, գրել է The Art Newspaper-ը։

Եկեղեցին գտնվում է երկրաշարժավտանգ տարածքում։ Նախատեսվող աշխատանքների ընթացքում շինության կառուցվածքը կամրացվի տեղական նյութերով, և կպահպանվի նրա 330 պատմական առարկայից բաղկացած հավաքածուն․ շինությունն ունի հում աղյուսից պատեր, հենապատեր և փայտե տանիքի կառուցվածք։

Շինությունը և նրա հավաքածուն

Getty-ն կտրամադրի պահպանման տեխնիկան և կզբաղվի շինության կառուցվածքի նախագծմամբ, ասել է ինստիտուտի նախագծերի առաջատար մասնագետ Կլաուդիա Կանսինոն։

Հավաքածուում կա Բեռնարդո Բիտիին վերագրվող 8 նկարից բաղկացած շարք։ Իտալացի ճիզվիտ քահանան և նկարիչը Պերու է բերել մաներիզմը՝ երկարաձգված կերպարներով հայտնի ոճը։ Շարքը ներկայացվում է որպես Բիտիի 8 կտավներից կազմված միակ ամբողջական հավաքածուն։ Հավաքածուում կան նաև փոխարքայության ժամանակաշրջանի քանդակներ, ձեռագրեր և պաշտամունքի ժամանակ օգտագործվող արծաթե առարկաներ։

Նախատեսվում է Բիտիին վերագրվող նկարներից մեկը տեղափոխել Լոս Անջելեսի Getty համալիր՝ գիտական ուսումնասիրության և պահպանման աշխատանքների համար։

Կունյոտամբոյից՝ Ռոնդոկան

Կանսինոն և նրա թիմը Ռոնդոկանի եկեղեցուն ծանոթացել են մոտակա Կունյոտամբոյի Սանտյագո Ապոստոլ եկեղեցում իրականացված նմանատիպ ծրագրի շնորհիվ, որն ավարտվել է 2019-ին։ Նրա խոսքով՝ Ռոնդոկանի համայնքն այնուհետև խնդրել է թիմին աջակցել իր դիմումին, որպեսզի Կուսկոյի արքեպիսկոպոսությունն ու նախարարությունն աշխատանքներ իրականացնեն համայնքի եկեղեցում։

Ռոնդոկանի ծրագիրը ներառում է բնակիչների ներգրավումը եկեղեցու խնամքի աշխատանքներում։ Կունյոտամբոյում թիմը տեղացիներին սովորեցրել է շինության խնամքը և ձեռնարկ կազմել տեղի բնիկների լեզվով՝ կեչուայով։ Կանսինոյի խոսքով՝ նույնիսկ ավլելու ձևն է կարևոր․ հատակից բարձրացած փոշին կարող է կպչել որմնանկարներին։