Լեհաստանի նախագահը հազարավոր մարդկանց հետ մասնակցել է Անկախության երթին

Նոյեմբերի 11-ին նախագահ Կարոլ Նավրոցկին հազարավոր մարդկանց հետ քայլել է Վարշավայի Անկախության երթին, իսկ վարչապետ Դոնալդ Տուսկը մասնակցել է Շչեցինում անցկացված ավելի փոքր տոնակատարությանը։

Միջոցառումները նվիրված էին 1918 թվականին Լեհաստանի անկախության վերականգնման 108-րդ տարեդարձին։

Վարշավայի երթը

Ամենամյա երթը գրավել է Լեհաստանի և արտերկրի ազգայնական ու ծայրահեղ աջ խմբերին, իսկ անցյալում ուղեկցվել է բռնի բախումներով։ Վերջին տարիներին դրան մասնակցել են նաև ավելի պահպանողական հայացքների տեր լեհեր, և երթը դարձել է երկրում Անկախության օրվա ամենամեծ զանգվածային տոնակատարությունը, գրել է The Guardian-ը։ Կազմակերպիչները հույս ունեին, որ կմասնակցի մինչև 500 000 մարդ։ Երթին մասնակցում էին հազարավոր մարդիկ։

Կազմակերպիչները «Լեհաստանում տերը լեհն է» կարգախոսով անցկացված հավաքը ներկայացրել են որպես ազգային հպարտության արտահայտություն։ Նրանց խոսնակ Ռաֆալ Բուցան ասել է, որ իրենք ցանկանում են տեսնել օտարերկրյա մայրաքաղաքներից անկախ և հնարավորինս միաէթնիկ Լեհաստան։

Տուսկի առանձին տոնակատարությունը

Տուսկը, որին Վարշավայի երթի մասնակիցները պարբերաբար թիրախավորում են վանկարկումներով ու պաստառներով, դիմել է ինչպես այնտեղ հավաքվածներին, այնպես էլ Շչեցինի միջոցառման մասնակիցներին։ Նա ասել է, որ անկախությունը, ազատությունն ու անվտանգ հանրապետությունն ընդհանուր բարիք են նույնիսկ տարբեր հայացքներ ունեցող մարդկանց կամ քաղաքական հակառակորդների համար։