Ռոթբերի կալվածքի գնման համար բնապահպանները կառավարության 1,9 միլիոն ֆունտի խոստում են ստացել

Կառավարությունը երկուշաբթի Հայաստանում ընթացող COP17 կենսաբազմազանության համաժողովում խոստացել է 1,9 միլիոն ֆունտ հատկացնել Ռոթբերի կալվածքի գնման համար։ Դրա շնորհիվ հանգանակված գումարը հասել է 29 միլիոն ֆունտի՝ 30 միլիոն ֆունտ նպատակային գումարից, գրել է BBC-ն։

The Wildlife Trusts-ը և Northumberland Wildlife Trust-ը 2024 թվականին գնել են Անգլիայում գտնվող լեռնային կալվածքի մի մասը, այդ թվում՝ Սայմոնսայդի բլուրները։ Նրանք ձգտում են ձեռք բերել 9 500 ակր տարածքով ամբողջ կալվածքը, սակայն մնացած մասի գնումը դեռ ավարտված չէ։

Վայրի բնության և գյուղատնտեսության ծրագրերը

Կազմակերպությունները նախատեսում են նպաստել վայրի բնության վերականգնմանը, վերականգնել ճահճուտները և խթանել բնության համար բարենպաստ գյուղատնտեսությունը։ Նրանց խոսքով՝ մնացած տարածքի գնումը կարող է օգնել միավորել վայրի բնության ապրելավայրերը 40 մղոն երկարությամբ միջանցքով՝ հյուսիսարևելյան ափից մինչև շոտլանդական սահմանի կենտրոնական հատվածում գտնվող Քիլդեր։

Կալվածքի մոտ 1 000 ակր (405 հեկտար) տարածք տնօրինող, հող վարձակալող ֆերմեր Քրիս Արմսթրոնգն այս տարվա սկզբին BBC-ին ասել է, որ, իր կարծիքով, տեղացիները գրեթե հավասարապես բաժանված են երկու կողմի, իսկ ֆերմերային համայնքի մեծ մասը ծրագիրը համարում է «անհեթեթություն»։