Իռլանդական RTÉ-ն ռումբի սպառնալիքից հետո տարհանել է Դուբլինի գրասենյակը

Իռլանդիայի ազգային հանրային հեռարձակող RTÉ-ն նոյեմբերի 6-ին ռումբի սպառնալիքից հետո տարհանել է Դուբլինի գրասենյակը։ Գլխավոր տնօրենի տեղակալ Էդրիան Լինչն ասել է, որ որոշումն ընդունվել է՝ առաջնահերթ համարելով աշխատակիցների անվտանգությունը։

Սպառնալիքին նախորդել էին ավիաընկերություններին ուղղված առանձին սպառնալիքներ, որոնք հինգշաբթի խափանել էին տասնյակ չվերթներ Եվրոպայում։ Իռլանդիայի կառավարությունը հայտնել է, որ հավանական է թվում աշխատանքը խափանելու համակարգված արշավի վարկածը, սակայն հայտնի չէ, թե ով է պատասխանատու և արդյոք սպառնալիքների հետևում առանձին անձինք են, թե համակարգված ջանքեր։

Ռադիոհաղորդումների ժամանակացույցը խախտվել է

RTÉ Radio One-ի «Today With David McCullagh» հաղորդումը դադարեցվել և փոխարինվել է երաժշտությամբ, մինչ աշխատակիցները հավաքվել էին հեռարձակողի Դոնիբրուկի համալիրի շենքերից դուրս, գրել է The Guardian-ը։ Կանոնավոր հեռարձակումը վերսկսվել է Դուբլինի ժամանակով 10:13-ին [Երևանի ժամանակով՝ 14:13-ին]։

Տարհանվել են նաև Newstalk Radio-ի, Today FM-ի, Virgin Media-ի և Irish Independent-ի աշխատակիցները։ Ոստիկանությունը խուզարկել է գրասենյակներն ու խմբագրությունները։

Մեծ Բրիտանիայի Sky հեռարձակողը հայտնել է, որ նույնպես անվտանգության սպառնալիք է ստացել, գնահատել է անվտանգային իրավիճակը և այդ մասին հայտնել իշխանություններին։ Նրա հայտարարությունն ընթերցվել է Sky News-ի եթերում, գրել է Deadline-ը։

Իշխանությունները փնտրում են պատասխանատուներին

Իռլանդիայի կառավարությունը հայտնել է, որ երկրի ոստիկանությունը զինված ուժերի, կիբերանվտանգության և ավիացիոն մարմինների հետ աշխատում է պարզել պատասխանատուների ինքնությունը։ Ոստիկանությունն ու զինված ուժերը կապի մեջ են նաև անվտանգության հարցերով իրենց եվրոպացի գործընկերների հետ։