Ռուսաստանի արտաքին գործերի նախարարությունը կանչել է Նորվեգիայի դիվանագետին գույքի կալանքի պատճառով

Ռուսաստանի արտաքին գործերի նախարարությունը հայտնել է, որ նոյեմբերի 3-ին կանչել է Մոսկվայում Նորվեգիայի գործերի ժամանակավոր հավատարմատարին՝ բողոքելու Ուկրաինայի պահանջով ռուսական պետական գույքի և «Պրոֆեսոր Մոլչանով» հետազոտական նավի շարունակվող կալանքի դեմ։

Նախարարությունը դատապարտել է Նորվեգիայի դատարանների որոշումները, որոնցով նավը մնացել է կալանքի տակ՝ Շպիցբերգեն արշիպելագի Բարենցբուրգ բնակավայրում, իսկ Նորվեգիայում գտնվող ռուսական պետական գույքի 5 օբյեկտ կալանավորվել է։ Դիվանագետին կանչել են այն բանից հետո, երբ սեպտեմբերին նավը կալանավորվել է, իսկ հոկտեմբերին բողոքը մերժվել է։

Արբիտրաժային վճիռն ու բողոքը

Նորվեգիայի իշխանությունները նավը կալանավորել են սեպտեմբերի 2-ին՝ ի կատար ածելու ուկրաինական պետական էներգետիկ Naftogaz ընկերության օգտին կայացված $4,2 միլիարդի արբիտրաժային վճիռը։ 2023-ին Հաագայում գործող արբիտրաժային դատարանը պարտավորեցրել է Ռուսաստանին փոխհատուցել ընկերությանը 2014-ին Ղրիմի բռնակցման ընթացքում բռնագանձված ակտիվների դիմաց։

Հոկտեմբերի 28-ին Նորվեգիայի դատարանը մերժել է պետական Arktikugol ընկերության բողոքը։ Ընկերությունը ղեկավարում է Շպիցբերգենում Ռուսաստանի գործունեությունը։ Դատարանը վճռել է, որ ընկերությունն իրավական հիմք չունի վիճարկելու կալանքը, և պարտավորեցրել է նրան Naftogaz-ին վճարել $300 000 դատական ծախսերի դիմաց, գրել է The Moscow Times-ը։

Նավի դերն ու Ռուսաստանի հաջորդ քայլը

Ռուսաստանի ԱԳՆ-ն հայտնել է, որ «Պրոֆեսոր Մոլչանովը» անձնակազմն ու կենսական նշանակության պաշարները ռուսական ածխահանման Բարենցբուրգ բնակավայր տեղափոխելու հիմնական միջոցն էր այն բանից հետո, երբ արևմտյան պատժամիջոցների պատճառով Ռուսաստանի հետ ուղիղ օդային կապը դադարեցվել էր։ Նախարարությունը նախազգուշացրել է, որ ձմռանը նավը երկար ժամանակ կանգնած պահելը կարող է հանգեցնել դրա խափանման և բնապահպանական լուրջ հետևանքների։

Նախարարությունը հայտնել է, որ Ռուսաստանի մյուս համապատասխան գերատեսչությունների հետ կձգտի հասնել ռուսական գույքի կալանքի վերացմանը։