HBO-ն սկսել է Սառա Սնուքի մասնակցությամբ «Թռչունները» սերիալի մշակումը

HBO-ն սկսել է «Թռչունները» մինի-սերիալի նախագծի մշակումը։ Սառա Սնուքը պետք է մարմնավորի Մայրա Մասիին և լինի նախագծի գործադիր պրոդյուսերը, հոկտեմբերի 27-ին գրել է Deadline-ը։ Նախագիծն Ալֆրեդ Հիչքոքի ֆիլմի և Դաֆնե դյու Մորիեի պատմվածքի նոր մեկնաբանությունն է, որի գործողությունները ծավալվում են մերօրյա Ալյասկայում։ HBO-ն առայժմ ստանձնել է նախագծի մշակումը, ոչ թե սերիալի արտադրությունը։

Այս դերով Սնուքը կվերադառնա HBO՝ «Ժառանգները» սերիալից հետո, որտեղ մարմնավորել է Շիվ Ռոյին։ Այդ դերի համար նա երեք անգամ առաջադրվել է «Էմմիի» և հաղթել 2023-ին։

«Թռչունները» ավելի քան մեկ տարի մշակման փուլում էր Universal Global Television-ում և դրան նախորդած ստուդիայում։ Deadline-ն նախագծի մասին գրել է մայիսին, իսկ ամռանը ստուդիան այն ներկայացրել է շուկային, որից հետո HBO-ն սկսել է դրա մշակումը։

Սպանության առեղծված՝ Ալյասկայում

Նախատեսվող սյուժեում Մայրան փոքրիկ դստեր հետ վերադառնում է տուն՝ Ալյասկա, երեխայի խնամակալության համար դաժան պայքարից խուսափելու նպատակով։ Նա գաղտնի հետաքննում է մանկության ընկերոջ կասկածելի անհետացումը։ Մարդասպանը դեռ ազատության մեջ է, իսկ Մայրային ուղղված սպառնալիքները՝ աճում։ Նա պետք է պաշտպանի դստերը թռչունների մահաբեր հարձակումներից, որոնք անբացատրելիորեն կապված են հանցագործության հետ։

Նոր տարբերակի գործողությունների վայրը և գլխավոր հերոսը տարբերվում են երկու նախորդ տարբերակներից։ Դյու Մորիեի պատմվածքը, որն առաջին անգամ հրատարակվել է 1952-ին, գյուղատնտեսական բանվոր Նաթ Հոքենի և նրա ընտանիքի մասին է․ թռչունները հարձակվում են հետպատերազմյան Քորնուոլում նրանց համայնքի վրա։ Հիչքոքի 1963-ի ֆիլմում անբացատրելի հարձակումները տեղի են ունենում Կալիֆոռնիայի Բոդեգա Բեյ քաղաքում։ Գլխավոր հերոսուհին՝ աշխարհիկ կյանքի ներկայացուցիչ Մելանի Դենիելսը, մեկնում է այնտեղ՝ փաստաբան Միչ Բրենների հետ ծանոթանալուց հետո։