Singapore Airlines-ը նախատեսում է S$2 միլիարդով թարմացնել սրահները

Singapore Airlines-ը նախատեսում է S$2 միլիարդ ծախսել ինքնաթիռների սրահները թարմացնելու վրա՝ փոփոխություններ նախատեսելով բոլոր երեք դասերում։ Ավիաընկերությունը հայտնել է, որ նոր սրահները կսկսեն շահագործվել 2027-ի երկրորդ կեսին։

Ավիաընկերությունը շուկայի մասնաբաժին է կորցրել հօգուտ այն մրցակիցների, որոնք մեծ ներդրումներ են արել սրահների թարմացման մեջ, գրել է The Guardian-ը։ Emirates-ը 2022-ին իր ողջ ավիապարկի վերազինման $5 միլիարդանոց ծրագիր է սկսել, որը ներառում է առաջին դասի խցիկներում ավելի շատ տարածք և արդիականացված տեխնոլոգիաներ։

Մահճակալներ, առանձնություն և ավելի շատ տարածք ոտքերի համար

Առաջին դասում միասին ճանապարհորդող երկու ուղևոր կկարողանա օգտվել հարակից նստատեղերի վրա տեղակայված երկտեղանոց մահճակալից։ Այն կունենա 203 սմ երկարություն և 152 սմ լայնություն, ինչպես նաև՝ գերմանական Paradies ընկերության արտադրած ներքնակի ծածկաշերտ, վերմակ և բարձերի ընտրանի։ Singapore Airlines-ի պնդմամբ՝ դա կլինի առևտրային ավիացիայի ամենամեծ երկտեղանոց մահճակալը։

Բիզնես դասի որոշ նստատեղեր նույնպես հնարավոր կլինի վերածել երկտեղանոց մահճակալների։ Թարմացումը ներառում է կոր սահող դռներ՝ ավելի առանձնացած միջավայր ապահովելու համար, ինչպես նաև գերբարձր հստակության 4K սենսորային էկրաններ։ Ավիաընկերությունը հայտնել է, որ էկոնոմ դասի ուղևորները ոտքերի համար ավելի շատ տարածք կունենան, իսկ անձնական իրերը պահելու համար նոր դասավորություն կնախատեսվի։

Ավիաընկերությունը բոլոր ուղևորներին խոստանում է նաև ինքնաթիռում ժամանցի բարելավված հնարավորություններ և սննդի ավելի լայն ընտրանի, ինչպես նաև Starlink-ի միջոցով ինտերնետ կապ։

Մրցակիցների թարմացումներն ու նոր սրահների ներդրումը

Air France-ը 2026-ին ներկայացրել է առաջին դասի վերանախագծված La Première սրահը, իսկ British Airways-ն աշխատում է իր A380 ինքնաթիռների առաջին դասի նոր սրահի վրա։