Գերմանական թանգարանը Սլևոգտի կտավը վերադարձրել է Ֆուքսի ժառանգներին

Գերմանիայի Վուպերտալ քաղաքի «Ֆոն դեր Հայդտ» թանգարանը կոլեկցիոներ Էդուարդ Ֆուքսի ժառանգներին է վերադարձրել Մաքս Սլևոգտի «Դրախտային թռչունները» (1900)։ Ketterer Kunst-ը The Art Newspaper-ին հայտնել է, որ վերադարձի գործընթացի ավարտից հետո ժառանգները կտավը հանձնել են աճուրդի։

Կոմունիստ և գրող Ֆուքսը հրեա կնոջ հետ փախել էր նացիստական Գերմանիայից։ Նա ստիպված էր վաճառել իր հավաքածուի գործերից՝ նացիստական իշխանությունների սահմանած պատժիչ արտագաղթի հարկը վճարելու համար։ «Դրախտային թռչունները» աճուրդով վաճառվել է Բեռլինում՝ 1937 թ․ հունիսին։ Նացիստները բռնագրավել էին նրա հավաքածուն, սակայն հետագայում ազատել այն բռնագրավումից։

Վուպերտալի քաղաքային խորհուրդը կտավի ծագման՝ սեփականության պատմության ուսումնասիրությունից հետո՝ 2026 թ․ հուլիսի 13-ին, հավանություն է տվել դրա վերադարձին։

Հարկադիր վաճառքից մինչև թանգարանի գնումը

Բեռլինի աճուրդում կտավը գնել է արվեստի գործերի վաճառական Հիլդեբրանդ Գուրլիտը, իսկ 1939-ին այն անցել է Ֆրից Սլևոգտին։ 2004 թ․ դեկտեմբերին Kunsthaus Lempertz-ի աճուրդում այն չի վաճառվել։ Թանգարանի մամուլի խոսնակ Մարիոն Մայերն ասել է, որ կտավը մնացել է աճուրդի տան մոտ և 2005-ին ցուցադրվել թանգարանում։ Այնուհետև թանգարանը 2006-ին Lempertz-ի միջոցով գնել է այն €120 000-ով (մոտ $130 000)։

Մայերի խոսքով՝ ժառանգները թանգարանի հետ կապվել են 2020-ին, որից հետո սկսվել է կտավի ծագման ուսումնասիրությունը։ Դրա ընթացքում օգտագործվել են Էդուարդ և Մարգարետե Ֆուքսերի հավաքածուն վերակազմելու նախագծի արդյունքները։ Նախագծին աջակցել է Կորուսյալ արվեստի գերմանական հիմնադրամը։

Կտավի ծագման պատմությունը ներառված էր 2004-ի աճուրդի կատալոգում, սակայն, Մայերի խոսքով, թանգարանն այլևս չի կարող պարզել՝ արդյոք գնելուց առաջ ստուգել է այդ պատմությունը կամ որքան մանրակրկիտ է այն ուսումնասիրել։ Նա ասել է, որ թանգարանը չի դիտարկում Kunsthaus Lempertz-ի դեմ իրավական քայլեր ձեռնարկելու հնարավորությունը՝ կտավի վերաբերյալ նրա կատարած ստուգումների առնչությամբ։