Հարավային Կորեայում բուհերի ընդունելության քննության ամեն փուլում ակնոցներ կստուգեն


Կրթության նախարար Չոյ Կյո Ջինը ստուգումների մասին հայտարարել է այն բանից հետո, երբ հարկային հաշվապահի որակավորման քննության մասնակիցը խոստովանել է, որ խարդախել է։ Նախարարությունը բացառել է նոյեմբերի 19-ի բուհերի ընդունելության քննության հետաձգումը։
Հարավային Կորեայում բուհերի ընդունելության միասնական քննության յուրաքանչյուր փուլում կստուգեն մասնակիցների կրած բոլոր ակնոցները։ Այս մասին նոյեմբերի 16-ին խորհրդարանական լսումների ժամանակ ասել է կրթության նախարար Չոյ Կյո Ջինը։ Ստուգումների նպատակն է կանխել գերբանականության (ԳԲ) օգնությամբ խարդախությունը։
Խելացի սարքերն արգելված իրերի ցանկում ընդգրկվել էին դեռ հուլիսին։ Նախարարությունը բացառել է նոյեմբերի 19-ին նախատեսված բուհերի ընդունելության համապետական քննության հետաձգումը՝ հարկային հաշվապահի որակավորման առանձին քննության մասնակցի՝ խարդախության խոստովանությունից հետո։
Յուրաքանչյուր քննակենտրոնում առնվազն մեկ աշխատակից կզբաղվի միայն խելացի սարքերի վերահսկմամբ (CNA)։ Չոյի խոսքով՝ յուրաքանչյուր քննասենյակի մուտքի մոտ հայտարարություններ կփակցվեն՝ նախազգուշացնելով քննությանը մասնակցելու արգելքի և քրեական պատժամիջոցների մասին։ Տեղում դժվար գնահատելի դեպքերի համար թեժ գիծը քննակենտրոնները կկապի կրթության տեղական մարմինների և նախարարության կառավարման կենտրոնի հետ։
Գործող կանոններով՝ խելացի սարք կրելու կամ օգտագործելու պահին բռնված մասնակցի տվյալ տարվա արդյունքները չեղարկվում են, և նա չի կարող քննություն հանձնել հաջորդ տարի։ Նրա դեմ կարող է նաև ոստիկանություն հաղորդում ներկայացվել՝ պաշտոնեական պարտականությունների կատարմանը խոչընդոտելու համար։
Նախարարությունը ձգտում է արգելքի ժամկետը հասցնել 3 տարվա, գրել է Al Jazeera-ն։ Չոյն ասել է, որ նախարարությունը խորհրդարանի հետ կաշխատի 3-ից 10 տարվա արգելք սահմանելու ուղղությամբ։ Ժամկետի երկարաձգման այս առաջարկներից ոչ մեկը դեռ չի ընդունվել։

Հան Վոն Սոկը, որը հարկային հաշվապահի որակավորման քննության թե՛ ապրիլյան, թե՛ հուլիսյան փուլում առաջին տեղն էր զբաղեցրել, նոյեմբերի 15-ին խոստովանել է, որ երկուսում էլ խարդախել է։ Նա ասել է, որ փոքրիկ տեսախցիկով լուսանկարել է հարցերը, դրանք ուղարկել ԳԲ գործիքի և պատասխանները ստուգել սմարթֆոնով։
Առաջին փուլում նա 400 հնարավորից ստացել էր 397,5 միավոր՝ 160 հարցից միայն 1-ին սխալ պատասխանելով։ Այս արդյունքը կասկածներ ու մեղադրանքներ էր առաջացրել, թե նա խելացի ակնոց է օգտագործել, ինչը սկզբում հերքել էր։ Հանը ներողություն է խնդրել քննությունն ազնվորեն հանձնած մասնակիցներից և ասել, որ իր գործողությունները, կարծես, կասկածի տակ են դրել նաև մյուս հաջողակ մասնակիցներին։
Սեուլի ոստիկանությունը հայտնել է, որ Հանի փաստաբանի միջոցով ստացել է նրա գրավոր խոստովանությունը և գործը հանձնարարել քննիչներին։ Հարկային հաշվապահի քննությունն անցկացնող՝ Կորեայի մարդկային ռեսուրսների զարգացման ծառայությունը հայտնել է, որ նրա դեմ քրեական հաղորդում կներկայացնի՝ գործունեությանը խոչընդոտելու համար։ Ծառայության նախագահ Լի Բյոն Հունը ներողություն է խնդրել միջադեպի համար։
Կառավարությունը հայտարարել է, որ այն անձինք, որոնց դեպքում կհաստատվի հարկային հաշվապահի քննությանը ԳԲ-ի օգնությամբ խարդախությունը, կզրկվեն որակավորումից և 5 տարի չեն կարողանա վերահանձնել այդ քննությունը։ Նախագահի աշխատակազմը հայտնել է, որ պաշտոնյաները նաև որոշել են քննել ազգային որակավորման քննություններում ԳԲ-ի օգնությամբ ենթադրյալ խարդախության դեպքերը։
Վարչապետ Հան Սոն Սուկը հայտնել է, որ կառավարությունն արտակարգ աշխատանքային խումբ կստեղծի՝ բուհերի ընդունելության քննությունը խարդախությունից պաշտպանելու միջոցներ մշակելու համար։ Նա պաշտոնյաներին հորդորել է մշակել ԳԲ-ի վրա հիմնված հայտնաբերման տեխնոլոգիա։ Չոյն ասել է, որ նախարարությունը մասնագետների հետ կխորհրդակցի ռադիոազդանշաններ հայտնաբերող սարքերի հարցով և կքննարկի դրանք հաջորդ տարվա քննությանը ներդնելու հնարավորությունը։
Պաշտոնյաները նաև քննարկում են քննության վայրերում հանրային Wi-Fi-ն անջատելու հնարավորությունը։ CNA-ն, վկայակոչելով Yonhap-ը, հայտնել է, որ կառավարությունն այս շաբաթվա բուհերի ընդունելության համապետական քննության ընթացքում միջոցներ կձեռնարկի՝ ներառյալ խելացի սարքերի հավաքումն ու հանրային Wi-Fi-ի արգելափակումը։
Վարչապետ Հան Սոն Սուկն ասել է, որ նոյեմբերի 19-ի բուհերի ընդունելության քննությունից առաջ համապետական ահազանգ կհնչի՝ հսկիչներին օգնելու հայտնաբերել չհանձնված հեռախոսները։ Դիմորդները պետք է անջատեն ու հանձնեն արգելված էլեկտրոնային սարքերը մինչև քննության մեկնարկը։ Նա հայտնել է, որ կներգրավվի մոտ 8 400 լրացուցիչ աշխատակից, և կստուգվեն սլաքավոր ժամացույցները, թևքերը, օձիքներն ու կոճակները։
4 րոպե