STAN-ի հրեշտակ ներդրողները հայտնել են HarborSite-ում ներդրում կատարելու մասին

STAN-ի հրեշտակ ներդրողները հայտնել են, որ ներդրում են կատարել ամերիկյան HarborSite կենսատեխնոլոգիական ընկերությունում, որի համահիմնադիրն ու ղեկավարը հայազգի Էրիկ Ազնաուրյանն է։ Ընկերությունը միացել է STAN-ի ներդրումային պորտֆելին, գրել է How2B-ն։ Ներդրման գումարը, ձեռք բերված բաժնեմասն ու պայմանները չեն հրապարակվել։

HarborSite-ը ձևավորվել է Ջորջ Չըրչի լաբորատորիայի հիման վրա։ Տեխնոլոգիայի կատարելագործման ուղղությամբ ավելի վաղ աշխատանքներն իրականացվել են Հարվարդի Wyss ինստիտուտում։ 2024 թվականի մարտի 18-ին հրապարակված նյութում ինստիտուտը հայտնել էր, որ թիմն աշխատում է ստարտափ ստեղծելու և հետագայում տեխնոլոգիան կլինիկական կիրառության հասցնելու ուղղությամբ։

Ինչ է նպատակ ունի մշակել HarborSite-ը

HarborSite-ը նկարագրում է մի մոտեցում, որի դեպքում հիվանդությունը փոփոխող գեները ներդրվում են գենետիկ նյութի մեջ՝ ժառանգական և տարիքային հիվանդությունների բուժման միջոցներ մշակելու համար։ Նպատակն է ստանալ բուժման միջոց, որի մեկանգամյա կիրառումը ցմահ ազդեցություն կունենա։

Wyss ինստիտուտը 2024 թվականի մարտի 18-ի նյութում նկարագրել էր մի մեթոդ, որով ԴՆԹ-ի մեծ հաջորդականությունները տեղադրվում են գենոմի՝ բջջի գենետիկ նյութի ընտրված հատվածներում՝ ռեկոմբինազներ կոչվող ԴՆԹ ներդնող ֆերմենտների միջոցով։ Նպատակն էր ապահովել, որ բուժական գեները գործեն կանխատեսելի, անվտանգ և երկարաժամկետ։ Այդ ժամանակ թիմը կենտրոնացած էր այն հիվանդությունների վրա, որոնք հնարավոր է բուժել լյարդի բջիջներում գեներ ներդնելով, այդ թվում՝ հեմոֆիլիայի։

Wyss-ի նկարագրությամբ՝ Ազնաուրյանի հետազոտական դերն էր գտնել ներդրման համար հարմար հատվածներ և գնահատել, թե որքան անվտանգ ու արդյունավետ են ներդրումները բջիջների տարբեր տեսակներում։

Հետազոտական աջակցությունից դեպի ներդրում