Ֆրանսիայի հարավում «Ադամ» փոթորկի առաջացրած հեղեղներից առնվազն չորս մարդ է զոհվել

BBC-ն հինգշաբթի հայտնել է, որ Ֆրանսիայում առնվազն չորս մարդ է զոհվել, ևս մեկը՝ վիրավորվել, այն բանից հետո, երբ «Ադամ» փոթորիկը երեքշաբթի երկրի հարավում համատարած հեղեղումներ է առաջացրել։ Ջուրը ծածկել է փողոցները, տասնյակ բնակիչներ տեղափոխվել են ժամանակավոր կացարաններ, խաթարվել է տրանսպորտի աշխատանքը։

Մինչ այդ փոթորիկն արդեն ուժեղ հեղեղումներ էր առաջացրել Իսպանիայի արևելքում, որտեղ առնվազն երեք մարդ էր զոհվել։ Իսպանիայի միջերկրածովյան ափի մի քանի քաղաքներ կտրվել էին արտաքին աշխարհից, իսկ տանիքներին մնացած մարդկանց փրկելու համար ուղղաթիռներ էին ուղարկվել։

Զոհեր, ժամանակավոր կացարաններ և տրանսպորտի աշխատանքի խաթարում

BBC-ի հաղորդմամբ՝ Բուշ դյու Ռոնում գտնվող մի նկուղում հայտնաբերվել են խեղդված երկու կանայք՝ 86 և 26 տարեկան։ Կորսիկայի տեղական լրատվամիջոցները հայտնել են, որ երեքշաբթի հեղեղի ջրերը քշել են լիաքարշակ մի ավտոմեքենա։ Մեքենայում գտնվողներից մեկը պատուհանով դուրս է եկել ու փրկվել, իսկ մյուս տղամարդուն մահացած են գտել։ Չորրորդ զոհի մասին իշխանությունները լրացուցիչ մանրամասներ չեն հայտնել։

Մոնպելիեի և Մարսելի միջև գտնվող Մուրիես և Սեն Մարտեն դը Կրո քաղաքների տասնյակ բնակիչներ տեղավորվել են ժամանակավոր կացարաններում։ Պաշտոնյաների խոսքով՝ այդ տարածքում մեկ մարդ է վիրավորվել։

Ֆրանսիայի տրանսպորտի նախարար Ֆիլիպ Տաբարոն հայտնել է, որ այդ տարածքում խաթարվել է ավտոճանապարհներով և երկաթուղիներով երթևեկությունը։ Չորեքշաբթի տարածած հայտարարությունում Բուշ դյու Ռոնի պրեֆեկտ Ժակ Վիտկովսկին ջրի մակարդակն աննախադեպ է անվանել և նշել, որ իշխանությունները բացառիկ ծավալի ուժեր են մոբիլիզացրել։

Մեկ այլ փոթորկի պատճառով քամու վտանգի նախազգուշացում է հայտարարվել

Ատլանտյան օվկիանոսից մոտենում է մեկ այլ մթնոլորտային համակարգ՝ «Օսթին» փոթորիկը, որը, ըստ կանխատեսումների, կհասնի Ֆրանսիայի հյուսիս-արևմուտք։ Դրա մոտենալու կապակցությամբ հայտարարված քամու վտանգի նախազգուշացումը կապված չէ հարավում «Ադամ» փոթորկի առաջացրած հեղեղումների հետ։