80 տարեկանում մահացել է «Էմմիի» դափնեկիր դերասանուհի Սյուզան Սենթ Ջեյմսը

80 տարեկանում մահացել է «Էմմիի» դափնեկիր դերասանուհի Սյուզան Սենթ Ջեյմսը, որը հայտնի էր «Խաղի անունը», «Մաքմիլանն ու կինը» և «Քեյթն ու Էլին» սերիալներով։ Նա մահացել է երկուշաբթի՝ հոկտեմբերի 26-ին, ենթաստամոքսային գեղձի քաղցկեղից, հայտնել է նրա ընտանիքը՝ The Hollywood Reporter-ում հրապարակված հայտարարության մեջ։

Հեռուստատեսությունում նրա կարիերայի բեկումը տեղի է ունեցել 1966-ի «Փառքը խաղի անունն է» ֆիլմով, որը դարձել է «Խաղի անունը» սերիալի փորձնական թողարկումը։ 1968-ից 1971 թվականներին ցուցադրված սերիալում նա մարմնավորել է խմբագրության օգնական Փեգի Մաքսվելին, որն աշխատում էր հրատարակչական ընկերության՝ իրար փոխարինող գլխավոր հերոսների հետ։ Առաջին եթերաշրջանում կատարած դերի համար նա 1969-ին արժանացել է «Էմմիի»։

«Մաքմիլանն ու կինը» սերիալից մինչև «Քեյթն ու Էլին»

«Մաքմիլանն ու կինը» սերիալի ցուցադրությունը սկսվել է 1971-ի սեպտեմբերին։ Սենթ Ջեյմսը մարմնավորել է Սալի Մաքմիլանին, որն օգնում էր ամուսնուն՝ Սան Ֆրանցիսկոյի ոստիկանության հանձնակատար Ստյուարտ «Մակ» Մաքմիլանին, բացահայտել հանցագործությունները։ Հանձնակատարի դերը խաղացել է Ռոք Հադսոնը։ Դերասանուհին սերիալում մնացել է հինգ եթերաշրջան և հեռացել 1976-ին՝ պայմանագրի շուրջ տարաձայնության պատճառով։

1984-ի մարտին նա «Քեյթն ու Էլին» սերիալով վերադարձել է հեռուստատեսային կանոնավոր աշխատանքին։ Նրա ազատամիտ հերոսուհին՝ Քեյթ Մաքարդլը, և Ջեյն Քերթինի մարմնավորած՝ կանոններին ավելի հետևող Էլի Լոուելը մանկության ընկերուհիներ էին, որոնք ամուսնալուծվելուց հետո միասին մեծացնում էին իրենց երեք երեխաներին՝ ապրելով Գրինվիչ Վիլիջի միևնույն տանը։ Կատակերգական սերիալն ավարտվել է 1989-ին՝ վեց եթերաշրջանից հետո։