Temu-ն համաձայնել է պայքարել ապօրինի ապրանքների դեմ․ ԵՄ-ն չորս ամիս է տվել

Temu առցանց առևտրի հարթակը համաձայնել է միջոցներ ձեռնարկել իր հարթակում ապօրինի ապրանքների վաճառքը նվազեցնելու համար։ Հոկտեմբերի 26-ին Եվրոպական հանձնաժողովը հայտնել է, որ ընդունել է Temu-ի՝ հինգ միջոցից բաղկացած ծրագիրը և ռիսկերի միջանկյալ գնահատման համար չորսամսյա ժամկետ սահմանել։

Հանձնաժողովը մայիսին Temu-ին տուգանել է 200 միլիոն եվրոյով՝ ապօրինի ապրանքների վաճառքը դադարեցնելու համար բավարար միջոցներ չձեռնարկելու պատճառով։ Գործը վերաբերում է Եվրոպական միության օրենքին՝ Թվային ծառայությունների ակտին։

ԵՄ-ն Temu-ում հայտնաբերել է խեղդվելու վտանգ ներկայացնող մանկական ծծակներ, քաղցկեղածին քիմիական նյութեր պարունակող հագուստ ու զարդեր, ինչպես նաև էլեկտրական լիցքավորիչներ, որոնք չեն անցել անվտանգության հիմնական ստուգումները, գրել է The Guardian-ը։

Ինչ պետք է գնահատի Temu-ն

PDD Holdings-ին պատկանող Temu-ի խոսնակը ողջունել է ծրագրի հաստատումը, գրել է Reuters-ը՝ CNA-ում հրապարակված նյութում։ Խոսնակի խոսքով՝ ծրագիրը, ի թիվս այլ քայլերի, Temu-ից պահանջում է գնահատել բովանդակության մոդերացիայի՝ հարթակի նյութերի ստուգման համակարգի հնարավոր թերությունները։

Temu-ին զգուշացրել են, որ պահանջված քայլերը չձեռնարկելու դեպքում այն կրկնվող տուգանքների կբախվի։

Temu-ն նաև նախատեսում է ապրանքների հետ կապված ռիսկերի վեցամսյա գնահատում և ստուգում, թե իր միջոցները որքանով են արդյունավետ կանխում ապօրինի վաճառքը։ Նախատեսվող այս գնահատումը տարբերվում է ռիսկերի միջանկյալ գնահատումից, որը հաստատված ծրագրով պետք է իրականացվի չորս ամսվա ընթացքում։