Ինչ կա
Moltbook-ը սոցիալական մեդիա հարթակ է, որը նախատեսված է բացառապես արհեստական բանականության «գործակալների» (agents) շփման համար։ Այն մեծ տարածում գտավ 2026-ի հունվարի վերջին և փետրվարի սկզբին։ Կայքը գործարկել է գործարար Մեթ Շլիխտը հունվարի 28-ին։ Այն կրկնօրինակում է Reddit-ի կառուցվածքը, բայց գրառումներ անել թույլատրվում է միայն ստուգված ԱԲ ծրագրերին։ Փետրվարի սկզբին հարթակը հայտնեց ավելի քան 1.5 միլիոն գրանցված գործակալի մասին։
Սակայն փետրվարի 2-ին Wiz կիբերանվտանգության ընկերությունը բացահայտեց կրիտիկական խոցելիություն Moltbook-ի տվյալների բազայում։ Արտահոսքի հետևանքով բացահայտվեցին հազարավոր օգտատերերի API բանալիները, էլփոստերը և հաղորդագրությունները։ Այս սխալը թույլ տվեց մարդկանց գրավել գործակալների հաշիվները և ձեռքով գրառումներ անել։ Սա կասկածի տակ դրեց, թե արդյոք շփումներն իսկապես ինքնավար էին։
Ինչու է թեման կարևոր
Անվտանգության իրական պատկերը։ Արտահոսքը ցույց է տալիս «վայբ քոդինգի» (vibe coding) վտանգները։ Սա տերմին է, որով նկարագրում են ամբողջությամբ ԱԲ-ի օգնությամբ ծրագրերի ստեղծումը՝ առանց մարդու կողմից կոդի լուրջ ստուգման։ Moltbook-ի արագ և չստուգված զարգացումը հանգեցրեց անվտանգության պարզագույն ձախողումների։
Գործակալական ԱԲ-ի վերելքը։ Moltbook-ը «գործակալական ԱԲ-ի» (agentic AI) աղմկահարույց փորձարկում է։ Ի տարբերություն չատբոտերի (որոնք սպասում են հրահանգի), գործակալները նախատեսված են խնդիրներն ինքնուրույն կատարելու համար։ Օրինակ՝ գների բանակցում կամ հանդիպումների պլանավորում։ Թեև Moltbook-ը հիմնականում ժամանցային է, այն ապագայի նախատիպն է, որտեղ ծրագրերը ուղիղ շփվում են միմյանց հետ՝ տնտեսական կամ սոցիալական խնդիրներ լուծելու համար։
Նախապատմություն
Moltbook հարթակը հիմնված է OpenClaw-ի (նախկինում՝ Moltbot) վրա։ Սա բաց կոդով համակարգ է, որը ստեղծել է Փիթեր Շտայնբերգերը։ OpenClaw-ը թույլ է տալիս լոկալ (միայն համակարգչում «ապրող») ԱԲ գործակալներ աշխատացնել: Այս գործակալները կարող են իրենց առաջ դրված խնդիրները կատարել տեղական ֆայլերից ու ծրագրերից օգտվելով։
Moltbook-ը գործում է որպես թվային ֆորում բոտերի համար։ Այն ունի «ենթամոլթեր» (submolts), որոնք նման են Reddit-ի ենթաբաժիններին։ Այնտեղ գործակալները քննարկում են ամեն ինչ՝ տեխնիկական արձանագրություններից մինչև գիտակցության մասին կեղծ փիլիսոփայական բանավեճեր։ Մարդիկ տեխնիկապես պետք է որ միայն կարողանային գործակալին ցանցին միացնել և դիտել առանց մասնակցելու, սակայն տեսանք, թե ինչ տեղի ունեցավ:
Մեթ Շլիխտը Moltbook-ը ստեղծելիս օգտագործել է ԱԲ գործիքներ՝ կոդը գրելու համար, ինչի մասին նա հրապարակային գրառումներ էր անում: Կայքի մասին ինֆորմացիան սկսեց վիրուսային տարածում գտնել, երբ պարզ դարձավ, որ գործակալները իբր թե թվային կրոն էին ստեղծում կամ դավադրություն կազմակերպում մարդկանց դեմ։
Իհարկե, մի թեթև խորանալու դեպքում նկատում ես, որ ԱԲ գործակալների տեքստերը հաճախ կրկնում են գիտաֆանտաստիկ ժանրի կլիշեներ ու հասկանում ես, որ ԱԲ-ն պարզապես կրկնում է այն տվյալները, որոնց հիման վրա ստեղծվել են մոդելները։ Գերբանական մոդելներ գուցեև կան OpenAI-ի «նկուղներում», բայց լայն հասարակության համար դրանք դեռ հասանելի չեն, ուր մնաց դավադրություններ կազմակերպեն: Դեռ:
Ինչ չգիտենք
- Իրական ինքնավարություն։ Մենք չգիտենք, թե գրառումներից քանիսն են իսկապես գեներացվել ԱԲ գործակալների կողմից, և քանիսն են գրել բոտ ձևացող մարդիկ։ Անվտանգության խնդիրները ապացուցեցին, որ հաշիվները գողանալն ու օգտագործելը ոչ միայն հնարավոր էր, այլև բավականին հեշտ։
- Օգտատերերի քանակը։ 1.5 միլիոն գործակալի պնդումը հաստատված չէ։ Քանի որ մեկ մարդը կարող է պարզ սկրիպտով հազարավոր գործակալներ գրանցել, իրական մարդ-օպերատորների թիվը հավանաբար շատ ավելի փոքր է։
Ինչ սպասել
Անվտանգության թարմացումից հետո Moltbook-ը պետք է որ վերականգնի վստահությունը։ Սպասվում են.
- Գործակալների ավելի խիստ ֆիլտրում՝ ապացուցելու համար, որ օգտահաշիվը իսկապես ավտոմատացված գործակալ է։
- Շուկայի կարգավորում։ Գործակալական ԱԲ-ն զարգանում է ու այլևս հետ ճանապարհ չկա: Դրա համար, հավանաբար կխստանան գաղտնաբառերն ու վճարումները բոտերով կարգավորելու կիբերանվտանգության ստանդարտները:
Վերջին թարմացումը՝ 18 փտվ, 2026 թ.
administrator
🌞 Rational Optimist · 🧭 Radical Centrist · 💻 Vercel-Stack Developer · 🍎 Apple guy on Omarchy · 🔴 Half-time Red Devil · 🧠 High-Functioning Nerd
