93 տարեկանում մահացել է դերասան Թոմ Սքերիթը

93 տարեկանում մահացել է Թոմ Սքերիթը՝ «Օտարը», «Լավագույն հրաձիգը» ֆիլմերով և «Ցանկապատեր» հեռուստասերիալում «Էմմիի» արժանացած դերակատարմամբ հայտնի դերասանը։ Նրա մամուլի ներկայացուցիչը Variety-ին հաստատել է, որ նա մահացել է չորեքշաբթի՝ բնական պատճառներով։ Մահվան լուրը Deadline-ին հաստատել է նաև նրա ընտանիքը։

Նրա աշխատանքը կինոյում և հեռուստատեսությունում տևել է ավելի քան 60 տարի։ Կինոյում հաճախ երկրորդ պլանի դերեր մարմնավորած Սքերիթը հեռուստատեսությունում հանդես է եկել նաև գլխավոր դերով՝ «Ցանկապատեր» սերիալում խաղալով շերիֆ Ջիմի Բրոքին։

«Ռազմադաշտային հոսպիտալից» մինչև «Օտարը» և «Լավագույն հրաձիգը»

Սքերիթը լիամետրաժ կինոյում առաջին անգամ նկարահանվել է 1962-ին՝ Կորեական պատերազմի մասին «Ռազմական որս» դրամայում։ Նա հանդես է եկել նաև հեռուստատեսային վեսթեռններում, այդ թվում՝ «Հրացանի ծուխը» սերիալում։ 1970-ի «Ռազմադաշտային հոսպիտալ» ֆիլմում նա մարմնավորել է զինվորական վիրաբույժներից մեկին՝ կապիտան Օգաստուս Բեդֆորդ «Դյուկ» Ֆորեսթին։

«Օտարը» (1979) ֆիլմում Սքերիթը խաղացել է «Նոստրոմո» տիեզերանավի հրամանատար Դալասին։ «Լավագույն հրաձիգը» (1986) ֆիլմում նա կրկին հրամանատարի դերում էր՝ Մայք «Վայփեր» Մեթքալֆը կործանիչների օդաչուների դպրոցի գլխավոր հրահանգիչն էր։

Նրա հետագա ֆիլմերից էր «Այնտեղ գետ է հոսում» (1992) դրաման։ Այստեղ նա մարմնավորել է պրեսբիտերական հոգևորականի՝ երկու որդիների հոր, որի ընտանիքին միավորում էր արհեստական ճանճ-խայծով ձկնորսությունը։

«Էմմիի» արժանացած գլխավոր դեր հեռուստատեսությունում

1992–1996 թվականներին Սքերիթը գլխավոր դեր է խաղացել «Ցանկապատեր» սերիալում՝ մարմնավորելով արտասովոր մի փոքրիկ քաղաքի շերիֆին։ Դրաման ու կատակերգությունը համադրող այս սերիալում դերակատարման համար նա 1993-ին արժանացել է «Էմմիի», իսկ 1994-ին կրկին առաջադրվել այդ մրցանակին։

Նա շարունակել է աշխատել հեռուստատեսությունում՝ «Արևմտյան թևը» սերիալում հանդես գալով սենատորի դերում, իսկ 2006–2009 թվականներին «Եղբայրներ և քույրեր» սերիալում պարբերաբար մարմնավորել է ընտանիքի ավագ Ուիլյամ Ուոքերին։ Հետագայում հրավիրված դերասանի կարգավիճակով նկարահանվել է նաև «Լավ կինը» սերիալում՝ 2014-ին, և «Տիկին պետքարտուղար» սերիալում՝ 2015-ին։