UForce-ը ներգրավել է ավելի քան £500 միլիոն (մոտ $665,9 միլիոն)

UForce-ն ավելի քան £500 միլիոն (մոտ $665,9 միլիոն) է ներգրավել ներդրողներից, որոնց թվում է Մեծ Բրիտանիայի կառավարությունը։ Ֆինանսավորման փուլում ռազմական անօդաչու սարքեր արտադրող ընկերությունը գնահատվել է £4,5 միլիարդ (մոտ $6 միլիարդ)։ Մեծ Բրիտանիայի Ազգային բարեկեցության հիմնադրամը տրամադրել է £113 միլիոն (մոտ $150,5 միլիոն), գրել է The Guardian-ը։

2026-ի մարտին Interfax-Ukraine-ը, վկայակոչելով Bloomberg-ին, գրել էր, որ UForce-ն ավելի վաղ Lakestar-ի և Shield Capital-ի գլխավորած մեկնարկային ֆինանսավորման փուլում ներգրավել է $50 միլիոն, և ընկերությունը գնահատվել է ավելի քան $1 միլիարդ։ Մեկնարկային ֆինանսավորումը վաղ փուլում կատարվող ներդրում է, որն օգտագործվում է բիզնեսը զարգացնելու համար։

Ուկրաինացիների հիմնադրած UForce-ը տեղակայված է Լոնդոնում և արտադրում է ցամաքային, օդային ու ծովային ռազմական անօդաչու սարքեր։ Դրանք լայնորեն կիրառվել են Ուկրաինայի պատերազմում։ Հիմնադիր Օլեգ Ռոգինսկին ասել է, որ ներդրումն ընկերությանը թույլ կտա ընդլայնել արտադրությունն Ուկրաինայի և նրա դաշնակիցների համար։

Ներդրողները և բրիտանական մատակարարները

Մյուս գլխավոր ներդրողը մասնավոր կապիտալի ներդրումային Valor Equity Partners ընկերությունն էր։ Նրա գործընկեր Քրիստոֆեր Կավոլին՝ ԱՄՆ-ի պաշտոնաթող գեներալը և Եվրոպայում ՆԱՏՕ-ի միացյալ զինված ուժերի նախկին գերագույն հրամանատարը, կմիանա UForce-ի տնօրենների խորհրդին։

Մեծ Բրիտանիայի պաշտպանության նախարարությունը հայտնել է, որ գործարքի շրջանակում UForce-ը ներդրումներ կանի բրիտանական մատակարարման շղթայում՝ Մեծ Բրիտանիայից ձեռք բերելով իրաններ, շարժիչներ, էլեկտրոնային սարքեր և պատվիրելով կահավորման աշխատանքներ։ Նախարարության խոսքով՝ Մեծ Բրիտանիայում կառուցված յուրաքանչյուր նավակի բաղադրիչների ավելի քան 70%-ը կտրամադրեն բրիտանական մատակարարները։

Մեծ Բրիտանիայի պաշտպանության նախարար Ուես Սթրիթինգն ասել է, որ մարտերում ձեռք բերված փորձը Մեծ Բրիտանիա բերելը բարձր որակավորում պահանջող աշխատատեղեր կստեղծի, կխթանի նորարարությունը և կամրապնդի ռազմական պատրաստվածությունն ու զսպման կարողությունը։