Բրիտանիայի մրցակցության կարգավորիչն առաջարկում է Microsoft-ին ռազմավարական շուկայական կարգավիճակ տալ

Այլ մատակարարի անցնելու խոչընդոտներն ու Microsoft-ի արձագանքը

Մրցակցության և շուկաների վարչության նախնական եզրահանգմամբ՝ Microsoft-ն ուժեղ դիրք ունի ուսումնասիրված բոլոր հինգ ոլորտներում՝ անհատական համակարգիչների գործառնական համակարգերի, աշխատանքի արդյունավետությանն ուղղված ծրագրային փաթեթների, անվտանգության ծրագրերի, սերվերային գործառնական համակարգերի և ռելացիոն տվյալների բազաների կառավարման համակարգերի։ Աշխատանքի արդյունավետությանն ուղղված ծրագրային փաթեթները միավորում են աշխատանքային գործիքները, իսկ ռելացիոն տվյալների բազաների համակարգերը տվյալները պահում և կազմակերպում են փոխկապակցված աղյուսակներում։

Կարգավորիչը Microsoft-ի ուժեղ դիրքը կապում է այն խոչընդոտների հետ, որոնք դժվարացնում են այլ մատակարարի անցնելը՝ սահմանափակելով հաճախորդների ընտրությունն ու թուլացնելով այլ մշակողների մրցակցությունը։ Այն նաև նշում է, որ Microsoft-ի առևտրային գործելակերպն ու ինտեգրման առավելությունները կարող են հաճախորդներին մղել ընկերության ավելի շատ ապրանքներից օգտվելու՝ ստեղծելով խոչընդոտներ, որոնք մրցակիցները չեն կարող հեշտությամբ հաղթահարել։

Microsoft-ը չի համաձայնել որոշման նախագծում ներկայացված՝ Մրցակցության և շուկաների վարչության տեսակետներին։ Ընկերության խոսնակը նշել է, որ իր ապրանքները կարող են աշխատել մրցակիցների ծառայությունների հետ․

«Մեր բոլոր ապրանքները, այդ թվում՝ Copilot-ը, բաց են և փոխգործունակ՝ հաճախորդներին հնարավորություն տալով դրանք օգտագործել մրցակիցների ծառայությունների հետ մեկտեղ»։

Ամպային ծառայությունների միջև անցման փոփոխություններն ու հետագա աշխատանքը

Բացի այդ՝ Մրցակցության և շուկաների վարչությունը հայտնում է փոփոխությունների մասին, որոնք հաջորդել են Microsoft-ի և Amazon Web Services-ի (AWS) հետ իր աշխատանքին՝ կարգավիճակի տրամադրման պաշտոնական գործընթացից դուրս։ Կարգավորիչն այդ աշխատանքը սկսել է մարտին՝ հետևելու, թե ինչպես են իրականացվում ամպային ծառայություններ ընտրելու՝ հաճախորդների հնարավորությունները բարելավելու խոստումները։

Մրցակցության և շուկաների վարչության տվյալներով՝ երկու ընկերություններն էլ վերացրել են տվյալների փոխանցման վճարներն ամպային ծառայությունների մատակարար փոխող հաճախորդների համար և նվազեցրել դրանք մեկից ավելի մատակարարից օգտվողների համար։ Վարչությունը հայտնում է նաև նոր մեխանիզմի մասին, որով հաճախորդներն ու մրցակիցները կարող են խնդրել հեշտացնել ծառայությունների համատեղ աշխատանքը։

Մրցակցության և շուկաների վարչության տվյալներով՝ ընկերություններն իրենց տվյալների կենտրոնները կապում են մրցակիցների կենտրոնների հետ՝ սկսելով Google-ից, և փուլ առ փուլ հասանելի են դարձնում արհեստական բանականությամբ աշխատող գործիքներ՝ մատակարար փոխելու համար անհրաժեշտ տեխնիկական քայլերն ավտոմատացնելու նպատակով։

Կարգավորիչը նշում է, որ պահպանվում են ամպային ծառայությունների մատակարար փոխելու և մի քանի մատակարարից օգտվելու խոչընդոտները։ AWS-ի և Microsoft-ի հետ համաձայնեցված հետագա աշխատանքը կենտրոնանալու է տարբեր ամպային միջավայրերում ինքնության և հասանելիության կառավարման վրա․ խոսքն այն համակարգերի մասին է, որոնք որոշում են՝ ով կարող է օգտվել ծառայություններից։ Աշխատանքն ուղղված կլինի նաև տարբեր մատակարարների միջավայրերում աշխատելու համար նախատեսված համակարգերի տեղակայման և տեղափոխման խոչընդոտների վերացմանը։

Մրցակցության և շուկաների վարչությունն ամպային ծառայությունների վերաբերյալ հաջորդ տեղեկացումը կհրապարակի 2027 թվականի գարնանը և շարունակում է քննարկել այս ոլորտում ռազմավարական շուկայական կարգավիճակի վերաբերյալ լիարժեք քննություն սկսելու հնարավորությունը։

Կարծիքների հավաքագրում՝ վերջնական որոշումից առաջ

Այս կարգավիճակը ստանալու դեպքում Microsoft-ը կդառնա երրորդ ընկերությունը, որի նկատմամբ կկիրառվեն թվային շուկաները կարգավորելու՝ Միացյալ Թագավորության նոր լիազորությունները։ Google-ը ռազմավարական շուկայական կարգավիճակ է ստացել առցանց որոնման և բջջային հարթակների ոլորտներում 2025 թվականի հոկտեմբերին, իսկ Apple-ը նույն ամսին այն ստացել է բջջային հարթակների ոլորտում։

Կարգավիճակի տրամադրումը չի հաստատում իրավախախտման առկայությունը և ինքնին չի պահանջում փոխել Microsoft-ի ապրանքների փաթեթները։ Այն կարող է Մրցակցության և շուկաների վարչությանը հնարավորություն տալ քննարկելու գործելակերպին վերաբերող պահանջներ կամ մրցակցությանը նպաստող այլ նպատակային միջոցներ՝ համապատասխան իրավական պայմանների բավարարման դեպքում։

Մրցակցության և շուկաների վարչությունը կարծիքներ է հրավիրում թե՛ առաջարկվող կարգավիճակի, թե՛ ճանապարհային քարտեզի վերաբերյալ՝ նախքան կարգավիճակի տրամադրման վերջնական որոշումը կայացնելը։ Օրենքով սահմանված վերջնաժամկետը 2027 թվականի փետրվարն է։