Սեպահվանդն ու Մանեշը Մեծ Բրիտանիայում մեղավոր են ճանաչվել Իրանին լրտեսել օգնելու համար

Վուլվիչի թագավորական դատարանի երդվյալ ատենակալները Մոսթաֆա Սեպահվանդին և Ֆարհադ Ջավադի Մանեշին մեղավոր են ճանաչել օտարերկրյա հետախուզական ծառայությանն աջակցելու համար։ Նրանք Իրանի համար հսկել են Մեծ Բրիտանիայում գտնվող թիրախների։

Սեպահվանդը մեղավոր է ճանաչվել նաև հանցագործության նախապատրաստման համար, իսկ Մանեշն այդ մեղադրանքով արդարացվել է։ Երդվյալ ատենակալները երրորդ ամբաստանյալին՝ Շապուր Նուրիին, արդարացրել են երկու մեղադրանքով էլ։

Հսկողությունն իրականացվել է 2024-ի օգոստոսից մինչև 2025-ի մարտը՝ թիրախների նկատմամբ բռնություն գործադրելու հնարավորություն ստեղծելու նպատակով, գրել է The Guardian-ը։ Թիրախների թվում էին Լոնդոնում գործող պարսկերեն Iran International հեռարձակողի լրագրողներ Մոջթաբա Փուրմոհսենը և Քամբիզ Հոսեյնին, ինչպես նաև UK Lawyers for Israel կազմակերպության հիմնադիր անդամ Ջոնաթան Թըրները։

Հսկողությունն ու հաղորդագրությունները

Իրանի երկու քաղաքացիները հավաքագրվել էին սոցիալական ցանցերի միջոցով։ Նրանք այցելել են թիրախների հետ կապված հասցեներ, լուսանկարել ու տեսագրել են և նրանց մասին տեղեկություններ որոնել համացանցում։ Սեպահվանդը Փուրմոհսենի տան հասցեն գտնելու համար օգտագործել է գերբանականության (ԳԲ) ChatGPT հարթակը։

Դատարանում հայտնել են, որ Սեպահվանդը 2024-ի դեկտեմբերին Փուրմոհսենին հսկելիս WhatsApp-ով հաղորդագրություններ է փոխանակել իր համակարգող Ամինի՝ Իսլամական հեղափոխության պահապանների կորպուսի հրամանատարի հետ։ Դատարանին հայտնել են նաև, որ Սեպահվանդը հույս ուներ լրագրողին սպանելու դիմաց ստանալ £150 000 (մոտ $200 000)։ Ձայնային հաղորդագրությունում նա ասել է, որ եթե թիրախը ներսում լինի և իրեն վճարեն £150 000, ինքը կսպանի նրան։

Դատախազ Բիլ Էմլին Ջոնսն ամբաստանյալների գործունեությունը որակել է որպես լրտեսություն և ասել, որ արտերկրում քննադատներին ու այլախոհներին վերացնելն Իրանի կառավարության քաղաքականությունն է։

Սպառնալիքների պատճառով Հոսեյնին ստիպված է եղել հեռանալ տնից և դադարեցնել հումորային մենախոսություններով հանդես գալը։ Հաղորդագրություններից մեկում պատկերված էր նրա մեքենան և ասվում էր, որ այն կպայթի, երբ նա հաջորդ անգամ գործարկի շարժիչը։ Իրանում նրա ընտանիքը նույնպես սպառնալիքներ է ստացել և հեռացել երկրից։