Ուկրաինան ռուս գեներալին մեղադրել է Սկովորոդայի թանգարանին հարվածելու գործով

Ուկրաինան ռուս գեներալ-լեյտենանտին հեռակա՝ նրա բացակայությամբ, մեղադրանք է առաջադրել Հրիհորի Սկովորոդայի անվան ազգային գրական-հուշահամալիրային թանգարանին 2022-ին հրթիռային հարված հասցնելու հրաման տալու համար։ Մեղադրանքի առաջադրման մասին հայտարարել է Ուկրաինայի գլխավոր դատախազը, հոկտեմբերի 30-ի հրապարակման մեջ գրել է ARTnews-ը՝ սպային ներկայացնելով որպես Ռուսաստանի ռազմաօդային և հակաօդային պաշտպանության ուժերի 6-րդ գվարդիական բանակի հրամանատար։

Գործը վերաբերում է Ուկրաինայի Խարկովի մարզի կալվածքին հասցված հարվածին։ Այդ կալվածքում է կյանքի վերջին տարիներն անցկացրել և 1794-ին մահացել 18-րդ դարի ուկրաինացի փիլիսոփա Հրիհորի Սկովորոդան։ Այնտեղ էր գտնվում նրան նվիրված թանգարանը։

Ենթադրյալ հրամանն ու մեղադրական եզրակացությունը

Գլխավոր դատախազությունը հայտնել է, որ դատախազները 2026 թ․ հոկտեմբերի 23-ին հաստատել են գեներալի մեղադրական եզրակացությունը։ Նա մեղադրվում է այլ անձանց հետ նախնական համաձայնությամբ պատերազմի օրենքներն ու սովորույթները խախտելու համար՝ Ուկրաինայի քրեական օրենսգրքի 28-րդ հոդվածի 2-րդ և 438-րդ հոդվածի 1-ին մասերով։

Դատախազները պնդում են, որ գեներալը դիտավորյալ է ընտրել թանգարանը որպես ոչնչացման թիրախ՝ իմանալով, որ այն պահպանության տակ գտնվող մշակութային ժառանգության օբյեկտ է, ոչ թե ռազմական թիրախ։ Նրանց պնդմամբ՝ նա հարվածի հրամանը տվել է 105-րդ ավիացիոն դիվիզիայի հրամանատարին, որն էլ այն փոխանցել է կործանիչ ավիացիոն գնդի հրամանատարին։

Վնասներն ու հրամանատարների դեմ վարույթները

Քննիչների պնդմամբ՝ 2022 թ․ մայիսի 6-ին ռուսական Սու-35Ս կործանիչը Խ-35 հականավային հրթիռ է արձակել Սկովորոդինիվկայի թանգարանի ուղղությամբ։ Հարվածից վիրավորվել է թանգարանը հսկող 1 քաղաքացիական անձ։

Դատախազների պնդմամբ՝ հարվածից ավերվել են տանիքն ու հարկածածկերը, վնասվել են պատերը, պատուհանները, դռներն ու ցուցանմուշները։ Վնասների պատճառով պատմական շենքի օգտագործումն այլևս անվտանգ չէ։